15 49.0138 8.38624 1 1 4000 1 http://wyrta.com 300

Angnood ka Lumshyrmit wow yoh ya u sarok wow poi cha ki thaw uiñke suwari wa em hapoh ka chnong

0 Comments

Jowai: Ka chnong Lumshyrmit ka wi na ki chnong ha East Jaiñtia Hills District kawa haap hapoh ka Wapung C&RD Block da pyrchang ko wow pynneh pynsah ya kiwa da e ka bei rymaw hadooh ka dustur riti deiwa kyrmen wow wanrah ya ka mynried kawa tyrchaiñ neibynta ka chnong ka thaw.

Ka chnong Lumshyrmit jngai ko kamwa 30 km na Khliehriat wa 32 km na Jowai. Em ko hadooh 300 tylli ki manyung wei kiwa boon na kiwa chong chnong im ki na ka rep ka riang wei i mylla sngi. Kani ka chnong em ko hajan ka chnong Cham Cham wa Mutong kiwa da em chwa ka angnood wow pynneh pynsah ya ka spah ka rymaw wow pynku ya ka kaam uiñke suwari deiwa em ko ya ka kchaaid Rynji wa ka thwai Sahksaw (kawa man leh i bynta ka wah Myntdu) ha chnong Cham Cham em ka kchaaid Moopun kawa em hajan ka chnong Mutong. Ha chilliang yong ka wah Myntdu won da em ka chnong Shkentalang kawa haap cha thaiñ War Jaiñtia, West Jaiñtia Hills District.

Heijooh i por ka chnong Lumshyrmit em ko leh i angnood wow kyntu ya ka chnong ka thaw lyngba ka kaam uiñke suwari tangwa ya kani ka chnong kiwa boon hi ym jooh em poi ki cha ka hadooh wa kiwa na jan kani ka chnong leh ym pu em poi ki ha ka khloo chnong kawa yirngam wa miat wa rben, kiwi de ki thaw kam u loom ‘Loom Lephaw’, ka thwai ‘Thwai Thlen’, ka ‘krem Liarsiej’, ka ‘krem Rai’, ka ‘krem Latang’, ka ‘kchaaid Mynthnin’, ka ‘kchaaid Byrleng’, ka ‘kchaaid Mushong’ wa ka ‘kchaaid Mynsngad’ kiwa em ha ki bynta wa cha wah ka kchaaid Rynji.

Yow pynman kaam yeini i thmu, ka Dorbar Chnong hi waroh kawi da kreh chitom ko katwa joh i buit i bor yong ka kamjooh leh da i yarap u MLA ka thaiñ, u Kyrmen Shylla wow chna wei wow pynpoi sarok khyndaw hadooh wa poi cha ki thaw paitke iwa jngai kamwa 4 Km na ki thaw sah kiwa chong chnong.

Heijooh i por ka Basin Development Unit (BDU), East Jaiñtia Hills District da e ko i kyrchaan ya ini i thmu wa bha yong ka chnong heiwa ha ka 31 Naisan uni u snem ryngkat i krehlang wa ka tnat Tourism Department, East Jaiñtia Hills District, ka Dorbar Chnong Lumshyrmit wa ki Green Volunteer na ki chnong waphær waphær da pynman ki ya ka program wa chi sngi neibynta wow pynkhooid ya ki jhep wei da thung hadooh 4000 tylli ki tre dieñ wa ki syntu ha ki bynta yong ka View Point kawa hajrong ka Krem Latang wei ha ki bynta wow man kam ki thaw chongke pyngngaad harood ka Thwai Thlen. Heijooh i por da esikai kyrpang ya kiwa chong chnong kammon wow pynneh pynsah ki ya ka spah rymaw kawa da e da u Blai.

I angnood ka chnong hi toh wow yoh noh da u sarok rong khnang wow pynsuk ya ki bru wa na baar wow wan pait ki ya kini ki thaw wa yoosuk neibhah khlem u sarok wa biang toh iwa eh wow poi cha kiwon kiwon ki thaw. Kamwa ka sorkar jylla da em ko i angnood wow kyntu kynrong ya ka kaam uiñke suwari hapoh ka jylla, kamtæ yooluti ki paidbah wow kyruiñ ki cha kani ka chnong wa da em chwa ka spah rymaw wa yoosuk.

Jop ka Lumkyrwiang waka Shuni Ummulong ha ka k....

Previous

Yachem u Conrad wa ki montri ya ki Rangbah Shn....

Next

0 Comments

Leave a Reply