15 49.0138 8.38624 1 1 4000 1 http://wyrta.com 300

Angnood ka Namdong wow yoh yarap na ka sorkar wow kyntu ya ka kaam uiñke suwari

0 Comments

Jowai: Ka Dorbar Chnong Namdong lyngba ka khubor wa da phah da u Waheh Chnong yong ka, u Dawan Lyngdoh da ong wa angnood ko wow yoh ya ka laad wow pynku lang ya ka kaam uiñke suwari kam kiwi ki thaw hapoh ka jylla kiwa da sdang ku.

Da ong u wa kamwa em ka sorkar, i thmu wa kyrpang wow kyntu ya ka kaam uiñke suwari hapoh ka jylla kamtæ da yooluti wa ka chnong leh daw yoh ko ya ka laad wow pynku ya kani ka kaam neibhah kani ka thaiñ man ko kawa sahdien dooh hapoh ka jylla khamtam heiyatoh wa ka yoh ka kot, ka yoh kaam yoh jaam ki khynroo khyllood wei da em wa haap pep skur chiteiñ por neidaw wym biang poisa ki bei ki pa kiwa im ja ha ka rep ka riang.

Advertisement ad1

Kamtæ i duna ka puræ puthi wei wym em ki laad kamai kajih da man ka chnong ka thaw kawa sahdien wei ka kaam rep leh ym toh kawa biang neidaw wa cha nongkyndong ya i dor da booh da kiwa thied katwa ngait ki ym toh katwa booh ki warep wei ini da wanrah ko yei eh wa khroo bha.

Yow pynkylla yeini waroh ka dong ka chnat ka chnong da pynmih noh ki ya ka thaw lai uiñke suwari ki paidbah wei kani ka thaw toh kawa da miat chwa kawa da e ka bei rymaw kam ki loom ki wah, ki dieñ ki siej wa ki kchaaid kiwa em hapoh kani ka thaw.

U Dawan Lyngdoh da pyntip u leh wa ha i lai luti ka chnong Namdong–A wow chna ya kani ka thaw uiñke suwari kawa tip leh kam ka Community Park yong ka chnong, da sdang ko wow pynman ya ki bru wow sñiawthooh ya i myntoi kawa mih na kani ka kaam wei lyngba i yarap lada yoh naka sorkar daw ye u pynku ya kani ka thaiñ kam kawi na ki thaw uiñke suwari wa pawnaam hapoh ka jylla.

Chooh chooh da ong u wa ka Dorbar Chnong Namdong man ko kawi na ki chnong hapoh ka Thadlaskein Block, West Jaiñtia Hills District kawa em chiboon ki thaw ka chnong (Community Land) kiwa miat kiwa ye u pynman kam ki thaw lai uiñke suwari wa pawnaam hapoh pyrthai neidaw wa man ki kiwa miat.

U Dawan Lyngdoh leh da ong u wa da yooluti u wa ka chnong hapoh kini ki sngi wow wan daw ye ko u pynwan dur ya kani ka Community Park wa da chna ki pyn da ki ya ki hi wei da yooluti wa ka sorkar leh daw kyruiñ khmat ko cha kani ka kaam wa da sdang ki wow yarap ko kam wa yarap ko cha kiwi ki chnong hapoh ka District.

 

Advertisement ad1

Cha u Conrad thoh ka HANM-JHU wow pyrchah yei ....

Previous

Dawa ka EJNC wow booh street light ha Khliehriat

Next

0 Comments

Leave a Reply