Advertisement ad1

Jowai : Hadien ka Shnongpdeng ye u ong won wa katni ka kchaaid Krangshuri toh da man ko sa ka wi ka thaw lai uiñke sawari wa pawnaam dooh ha West Jaiñtia Hills.

Ya ka kchaaid Krangshuri wa ki soo dong soo kun yong ka da pynkylla dur ya ka deiwi tawan da ka Raij Buam wei lada ym em de poi phi cha ka ha kini ki 6 bnai ye ong wa da man kamwa lai cha ka kchaaid wa thymme.

Advertisement ad1

I nynkong wow yoo phi toh wa ka kchaaid leh rap heh ko heipor tlang neidaw wa da pyndap ya i bynta wa liat ka um khlem yoh ko u noh na khleih ka kchaaid.

Da em leh ka wi ka nan khian wa dang chna kyrpang ya ki khynnah ha chrooh ka kchaaid, da em leh ki chuki wa chna da ki siej kamjooh i yung rieh sngi rieh slap. Daw chna leh ya ki sapdoi wa kiwi yow man kam ka Children’s Park.

Ha kini ki sngi da khang leh ya kiwa baamdooh ha neiñ ka kchaaid wa ha wah ko wei ya kiwa kwah baam doh da chna ya ki thaw baamdoh wa em cha chilliang ka khchaaid wei da pynbiang leh ya um ya ki.

Yow lai cha ini i thaw baamdooh da chna luti na neiñ ka kchaaid kamjooh wa na wah ka khcaaid.

Hei yoh u Wyrta wow yaklam wa u Donbok Buam, Secretary ka Raij Buam Environmental Protection Association da ong wa nadooh u bnai Khonchonglad yong u snem 2016 da sdang wow khrong bai psiah cha ka kchaaid Krangshuri wei da chim T. 20 ya kiwa heh katwa ya ki khynnah won ym em chim bai psiah. Ya kiwa baamdoh da chim T. 50 chi dhab.

Da ong u leh wa ha kini ki ar bnai nadooh wa khrong bai psiah da kheiñ heiwa 500-600 ngut da wan ki bru aw jan man ka sngi. Wei da ye ki u kamai hadooh T. 10,000 chi sngi wei ya kani ka poisa da pynemkaam wow su tulop cha ki bru wa booh wow pynkhooid ya kani ka thaw. Da pyntip u leh wa neiliang ka sorkar da yarap ko da ki paikhana, ki thaw noh jhep, ki chken ki siej wow kær ya ka luti la kjat wei katni da chna sa ka wi ka luti kjat na Lad Japlem wa ye ki paidbah u hiar dei kjat cha kani ka kchaaid wei u poi bait ki ha ka yingkieñ moo kawa em ha Umiaknieh hajan ka kchaaid Krangshuri.

Ka kchaaid Krangshuri kam ka Shnongpdeng wa pyllai da ki tre chnong namo ki tre thaw da man biang ki ki nongmuna wa ki kaam uiñke sawari man ki kiwa jop manda kit khlieh da ki tre chnong tre thaw deiwa yarap ka sorkar.

Share this:
Share on Facebook0Tweet about this on TwitterGoogle+0
Advertisement ad1