Jowai: Ka Jaintia Carpenter and Masonry Association, (JCMA) da chim ko ïa ka rai wow beh seiñ noh ïa u General Secretary ïong ka u Ma Ruhipaya Andy Dhar nei daw wa pynkheiñ u ïa ki kyndon krehkaam yong ka seiñ.

Ïa kani ka rai da chim ha ka General Meeting yong ka seiñ kawa da man ha ka 12 tarik Naikhynde yong uni u snem. Na i liang ka JCMA da ong ko wa da chim ïa kani ka rai hadien wa da chem ko wa uni u General Secretary da kheiñ stiñ u yei kaam nadooh wada dep pynkhle ïa ka Lucky Draw yong ka seiñ kawa da man ha ka 20 Naichiphaw 2014 weiwa da khut yalang u yong ka Executive Committee dang du chisien. Da em leh ki yalang kiwa khut u tangwa oo won ym jooh poi cha ki.

Advertisement ad1

Hadien ini na i liang yong u President ka seiñ da khut u da ka yalang kawa kyrpang hadooh le sien tangwa uni u General Secretary ym jooh wan u cha ki han lada pyntip cha oo chaphang kini ki yalang. Heijooh i por ka seiñ da kynnoh ko leh wa uni u General Secretary da ksoh beit uki ki jingkheiñ yong ka seiñ kattu la kamwa chisnem tam.

Kamtæ hajrong ini i leh pyrshah uni u General Secretary ka seiñ da rai beh kaam noh ïa oo. Ka seiñ da maham ko leh wa neini chakhmat ym hoi de u pynemkaam u yei pyrtuid yong ka seiñ la heiwon heiwon leh weiwa ka seiñ ym em de u bahkhlieh ko ïa oo. Ïa kani ka khubor da pyllait da u Publicity Seretary ka JCMA u Ma K. Siangshai.

Da phah wow pynthymme ïa ki Lisen suloi
Jowai: Katkam ka hukum yong ka Sorkar India, U Deputy Commissioner yong ka West Jaintia Hills District, da pyntip u cha waroh kiwa em Lisen Suloi hapoh ka District ki wym pu dep pynthymme (Renew) ïa ki lisen, da toh u lai pynthymme noh ki ïa ki khnang wow yoh u pynpsiah ïa ki ha ka National Database of Arms License (NDAL) weiwa da e por wow leh ya ini hapoh chi bnai nadooh wa mih kani ka khubor.

Kitu ki wym pynthymme ïa ki hapoh i por wa da booh daw chah pyndam (Cancel) ka lisen yong ki weiwa ïa ki suloi yong ki daw chim noh da ka sorkar.

Kani man ko ka wyrta cha waroh kiwa em Lisen suloi.

Da pynlait ïa u Khoo wei Chini
Jowai: U Deputy Commissioner (Supply) West Jaintia Hills District, da e u ïa kani ka wyrta wa da pynlait paidbah ïa u khoo APL, Additional APL, BPL, Additional BPL yong u bnai September (Naikhynde) 2015 wa i  chini yong u bnai July (Nai Ynñiaw) 2015.

Ïa u khoo APL daw saam hei khia 15. 136 kilo nei bynta kawi ka F.I card chi bnai hei dor Rs. 9.70 chi kilo

Ïa ki Additional APL u man 7.56 kilo hei dor Rs. 9.70 chi kilo.  Ïa ki BPL daw saam hei khia 35 kilo hei dor Rs. 6.15 chi kilo ha sor wa ha nongkyndong. Katwa ïa ka Additional BPL u man ko 9.34 kilo hei dor Rs. 6.15 chi kilo.

Ïa ka bhah yong ka AAY i khia u man 35 kilo man ki AAY F.I. Card hei dor Rs. 3.00 chi kilo.

I chini won u man i hei khia 599 gram hei dor Rs. 20.00 ha sor wa ha nongkyndong.

Share this:
Share on Facebook0Tweet about this on TwitterGoogle+0
Advertisement ad1