Advertisement ad1

Shillong: Ka Executive Committee yong ka People Democratic Forum (PDF) hapoh i yahkhmat u Pynshngain N Syiem kam u CEM da chah beiñ ko ha ka liang pyrchah wa kular hi-eh ko wow chna pynmait ya u sarok Nongstoin-Wahkaji iwa sahkut khlem man kaam neidaw wa em i ya takhooh wa ka tnat PWD ka sorkar jylla.

Hawa yachim bynta ha ka kynta booh ya ki phang kylli ha yung dorbar tlang ka KHADC ynne ka sngi, u MDC ka Langrin u Manstudy Nongrem uwa man leh uwa yahkhmat ka ya liang pyrchah ka KHADC, da beiñ joor u ya u CEM ka KHADC u Pynshngain uwa da kular wow chna ya kani ka sarok tangwa ym em leh u iyi iyi leh hadooh katni.

Advertisement ad1

Da ong u wa kammon u CEM kular u wow chna ya u surok hawa ka PWD ym em e No Objection Certificate (NOC) ko iwa mut leh wa pynbiej paidbah donhi.

U Manstudy da ong u wa ka KHADC toh u e poisa ko cha ka tnat PWD wow chna ya uni u sarok neibhah ka em ko ki Engineer kiwa yatoh wa ini i kaam.

Ha kani yania da chimbynta lang ki dkhot ka liang pyrchah wa kynthup ya u Donkupar Sumer, ka Teilinia Thangkhiew wa kiwi nalor u Lamphrang Blah uwa wanrah ya kini phang kylli.

Neiliang u CEM won da pynche u wa ka KHADC ymye ko u chna ya uni u sarok neidaw wa ka PWD ym e NOC ko katwa ya poisa won toh u pynemkaam na kawa yoh na ka Special Assistant Grant (SAG) kawa T. 20 Klur yong u snem 2016-17 wei da yabhah noh ya kani ka poisa cha ki MDC yow pynku yaka poisa wow wanrah yei roi i paar naka T. 2 Klur cha ka T. 3 Klur.

U CEM da kular u wa ka Council daw pyrchang biang ko wow booh poisa neibynta uni u sarok ha ka mang poisa 2017-18 lada yoh poisa naka sorkar pyrdi.

Ka MDC ka Mylliem ka Teilinia Thangkhiew da dawa ko na ka KHADC wa toh u booh noh da ki CCTV ha waroh ki soodong sookun ka yung krehkaam ka KHADC yow yada na kiwa kwah u leh pynsih.

Da ong ko leh wa emkaam u booh CCTV ha MDC hostel neibhah boon ki bru wa wan noh jhep cha jan yong ka.

Neiliang u CEM da jubab u deiwa ong wa katni em 16 tylli ki CCTV wa booh ha KHADC wei da kular u daw booh chooh ya ki.

U Donevan Kharwanlang won da kylli won u wa hadooh katwon ngut ki bru kiwa sah ha khappood kiwa wan Register thaw ha ka Council wei hei yatoh wa ini da jubab u EM u Hadrian Lyngdoh da ong u wa hadooh katni da em 95 ngut kiwa wan Register katwa 123 ngut kiwa dang sah ki ha ka bichaar bniah chwa wow Register ya ki thaw yong ki.

U CEM won da pynrap u deiwa ong wa ka Council ymye ko u e pata ya ki bru wa wan Register ha ka Council tangwa man ko kam wow booh hi-eh yei pyrtuid yong ki neibhah ki tnat sorkar wa ki Bank ym bien ki u tipmit ya Register ka Council wei da chim ki ya ka pata wa Register ha u Sub-Registrar ka sorkar jylla.

Share this:
Share on Facebook0Tweet about this on TwitterGoogle+0
Advertisement ad1