Advertisement ad1

Jowai : Ka tnat pulit yong ka West Jaiñtia Hills District chirup i yakrehlang wa ka North East Network ha kani ka 30 tarik u naisan da pynman ki yaka Community Awareness Programme on Crime Against Women ha District Library Auditorium, Jowai.

U SP ka West Jaiñtia u R. Muthu da ong u wa wan i cha pyrthai toh lyngba ka bei, kawa pynheh wa ri sumaar ko ya i, ha yung yoh lok yarkhai yakmen chirup wa ki payu kynthai, hei lai skur lai puræ yachem lok ya sñiawsuk lang wa ki lok kynthai, neitæ hadien i puræ won da thooh yaka kurim iwa pynbood won sei yoh khon chynrang kynthai tæ neiyi i daw won wa yoobeiñ yaki kynthai, chwa u thmu iyi iyi toh u pyrkhat bha liang wa nang.

Advertisement ad1

Da ong leh wa em ki aiñ wow yada neichah thombor ki kynthai khynnah tangwa kat danglai ki sngi i chah lehbeiñ dang joor ki wei boon na ini jia i ha yung ha sem.

Kamtæ yow ye u pyndooh jait yeini i chah thombor toh u sdang nadooh dangkhian na yung wei kamjooh u rah ya ka khubor cha kiwi wa ymhoi u lehbeiñ ya ki kynthai khynnah.

Neitæ da kyntu u wow husiar naki Cyber Crime heiwa da chah lehbeiñ ki lyngba ka Facebook, ka Whatsapp ha ki group wa kiwi kiwi.

U S.C. Laloo uwa man kam u ADM ka West Jaiñtia yooluti u wa kani ka prokram u pynmyntoi ko yaka imlang sahlang wei wow pynsñiawthooh ko yaki paidbah neibhah du ka aiñ leh chem yabor ki wow thooh ya kiwa emkti wow leh pyrchah ya ki kynthai wa khynnah.

Ka Theilin Phanbuh, kawa man kam ka Chairperson yong ka Meghalaya State Women Commission, hei klam yong ka da ong ko wa yoosar neidaw wa rap kheiñ stiñ ki Legal Aid wa yasaaid ya kini ki mukotduma wei i sah teiñ ki da ki boon snem haki District Court, tæ kiwa leh yei kaam pyrchah ya ki kynthai wa khynnah chim kabu noh ki.

Da ong haroh ko wa kam kini ki mih ki kaam boonsien mih ki na kitu ki khynnah wa wan naki manyung wa piah wa pra iwa ktah yei rukom im, i puræ puthi, i chait i khiah wa kiwi.

Neiliang ka Women Police SI ka I. Kharpran  da pyntip ko wa ya kani ka e sikai wow pynsñiawthooh cha ki paidbah hajrong i chah lehbor ki kynthai khynnah daw pynman ki ka ha kylleiñ ki chnong wa haap hapoh ka West Jaiñtia.

Kiwi won kiwa e i klam kynthup ia u addition SP u Shemphang Syrti, wa kiwi kiwi haka yalang wa pynlai da ka J. Phanbuh na ka North East Network.

Share this:
Share on Facebook0Tweet about this on TwitterGoogle+0
Advertisement ad1