15 49.0138 8.38624 1 0 4000 1 https://wyrta.com 300 0

Da ka yalang wa i lai paidbah u pynman ka HYC-MC neidaw wa sih u sarok Nongstoin-Maweit

0 Comments
Advertisement ad1

Shillong: Ka HYC – Maweit Circle (MC) da sñiawkhia ko hajrong i sih u sarok Nongstoin-Maweit hadooh ymye de wow mutdur hadooh wa da mih i kylli wa hadooh katwon ka sorkar Meghalaya u suki hi-eh ko yei eh i khoo, wa i chitom ki paaid ka thaaiñ Maweit.

Da sñiawkhia ko yei iehbeiñ ka sorkar ya ka dong ka thaaiñ Maweit ha ki liang waroh khamtam wa sih ware u sarok Nongstoin-Maweit heiwa ka seiñ chong jhan ko ya ka Executive Meeting ynne ka 12 tarik ha Dorbar Hall Maweit heiwa da chim ko ka rai wa khor wow pynsñiaw cha ka sorkar deiwa pynman ya ka lai paidbah wei chah thngan na Maweit chadooh Nongstoin ha ka 27 tarik uni u bnai. 

Kani ka lai paidbah u sdang ko na Iew Maweit deiwa pynman chwa ya ka yalang heipor 9:30 i step heiwa daw yoh yei klam na ki Rangbah Shnong wa ki bru pawkhmat ka thaaiñ i wow pynbood won da i lai paidbah nadooh i por 11:00 waje i step. 

U Jeremiia Dkhar uwa man u President ka HYC-MC da pynsñiaw u wa ini i wym mano wei i ieh khonswet ka sorkar Meghalaya ya ka dong ka thaaiñ heiwa da pynyoo wa ka thaaiñ Maweit waroh kawi ym haap de ko hapoh u pood u ang ka sorkar Meghalaya.

Ka seiñ daw lai pynsñiaw ko leh yeini i eh i khoo ki paidbah cha u Symbood Montri Rangbah uwa man leh u montri ka chnat PWD u Prestone Tynsong wei wow pynkynmoo ya ka sorkar ya ki kular wa da khlai ha ki paidbah lyngba u MLA ka thaaiñ u Gigur Myrthong wow wanrah noh da ka sarok Two-lane wei lada ymye ka sorkar wow leh yeini da kular u wow siang rong ya u sarok na Nongstoin cha Maweit heiwa u pynlut u yeini waroh na kata.

Ka HYC-MC dei mynsien wa sñiawkhia yei eh i khoo ka thaaiñ da kyrpaad ko ya waroh ki paidbah wa chong chnong ka thaaiñ Maweit kam ka Synjuk ki Rangbah Shnong, ki seiñbhalang, ki Seng Samla Shnong, ki Seng Longkmie wa kiwi kiwi wow emlang ha kani ka lai paidbah neibynta i bha i miat yong ka thaaiñ waroh kawi.

0 Comments

Leave a Reply