15 49.0138 8.38624 1 1 4000 1 http://wyrta.com 300

Da pyndur wa khih u khmi ha Little Flower English SS yow pynman ya ki khynnah kiwa da pynkhreh

0 Comments

Jowai: Ka yung krehkaam ka District Disaster Management Authority, West Jaiñtia Hills District kam chibynta wow pynsñiawthooh ya ki khynnah skur wa kiwa sikai ka Little Flower English Secondary School, Jowai, hajrong wa kammon u man kiwa pynkhreh wow yada ki ya ki hi kamjooh u yarap ya kiwi tawon lada jia wan i bor pynjæd tympra ka rymaw heiwon iwon i por khamtam u khmi, da pynman ko ya ka School Mock Exercise ha kani ka skur deiwa pyndur wa da jia sakhiat i khih khmi  wei kiwa sikai ki khynnah skur leh da thooh ki ya ki laad yarap.

Neibynta kani ka Mock Exercise ha kani ka sngi da yakrehlang leh ka tnat DM&HO Jowai, ka tnat Home Guard & Civil Defence, ka tnat Fire & Emergency Services wei da emlang leh ki Observer naka tnat PWD Building, ka tnat DSEO wa kiwi kiwi.

Advertisement ad1

Da sdang ya ka Mock Exercise deiwa pynkieh ya ka siren kam ka dak wa da khih khmi sakhiat heiwa kiwa sikai, ki khynnah skur da rieh ki hapoh ki meij ki ben, neitæ won da mih ki chalait wei hadien wa kiwa sikai dep ñiaw ki ya ki khynnah chem ki wa em kiwa duna tæ pyntip ki chaka tnat District Disaster Management Authority wei wut wut da wan poi ka tnat Civil Defence, ka Fire & Emergency Services waka tnat i chait i khiah nadooh ki Doctor ki Nurse wow e yarap ya kiwa mynsoo.

Neitæ won da yoh leh i batai pynche na u O. Lamare yong ka tnat Fire Services wa kammon u pynemkaam ya u Fire Extinguisher hei wow tympleh yei diñ wa khian khnang yow lait nei kyr-ooh i.

Hadien wada kut ka Mock Exercise da em won ka yalang tbian wa pynlai da u Ebormi Langshiang uwa man u District Disaster Management Authority wei da yooluti u leh wa lyngba kani ka esikai wa yoh u yoo da ki khmat kamjooh wa yoh u chim bynta ye ko u e i yarap wa rap bha wow sñiawthooh lada jia sakhiat i.

Da khana u wa neiliang ka sorkar India da pyrchang ko u thooh chiboon ki laad yarap lyngba ki buit thymme heiwa du lyngba i pynemkaam ya ki Apps wa em ha ki mobile phone yong i u yoh yutip i chwa u jia iwon iwon i por pynjæd tympra ka rymaw.

Kiwi won wa e i klam ha kani ka sngi kynthup ki ya u Assistant Dy. Controller Civil Defence, Jowai u Joshwa Nongrum, u Principal ka Lilttle Flower English Secondary School u Amulya Hore, u Chanmitre Shullai kam u Observer naka tnat PWD Building, ka R. Rymbai naka tnat DM&HO  wa u O. Lamare naka tnat Fire Service.

Da khylliap lama noh ka PDF Mawhati Zonal Comm....

Previous

Da thung ya ki montri wow booddien ya ki schem....

Next

0 Comments

Leave a Reply