Jowai : Ynne ka 25 tarik da lehwarom ya ka “National Voters Day” ha ka kamra Conference Hall ka ophis u DC West Jaintia Hills, Jowai.

Ha kani ka sngi da pdiang ya 30 ngut ki khyroo khyllood wa dang yoh EPIC thymme na ki soo tylli ki constitency ka Nartiang, Jowai, Raliang wa ka Mookaiaw. Deilang ha kini ki soo tylli ki constituency da em 1456 ngut ki wa psiah pyrtuid thymme ha ka electoral roll kawa kheiñ hadooh ka 1 tarik u Duyatra. Ha Nartiang da em 425 ngut, ha Jowai 424, ha Raliang 157 wa ha Mookaiaw da em 450 ngut ki nongthap vote thymme.

Da saam ya ki EPIC cha ki 30 ngut da ki nongmihkhmat ki seiñ hima sima (Political party) kiwa emlang ha kani ka sngi kitæ toh ka INC wa wan mih khmat da u ma G. Sten, HSPDP wa wan mih da u ma H.B. Dan, na ka NPP da wan u ma O. Lamin wa na ka UDP da u ma C. Lamare. Da saam lang leh ya kini ki EPIC da ki heh ka distrik.

nvd-day1

U Arunkumar Kembhavi, DC West Jaintia Hills da kyntu u ya waroh khamtam ya kiwa dang yoh EPIC thymme wa ym hoi u dai ya ka Vote yong ki. Toh u man ki kiwa chlur u jied ya ki Kyrtong (Candidate) wa yoo biang ki khlem pait ya ka niam, ka spah wa kiwi kiwi ki wa ye u yah bakla heipor jied ki ya ki kini ki kyrtong. Kamjooh da ong u wa ham chim wa ka sngi thap vote toh wa sngi wow yut lai ke cha kiwi ki chnong hanlada man ko ka sngi chuti leh tangwa i kordor yong kani ka sngi ym hoi u kheiñke i ka.

Da saam leh ha kani ka sngi ya ki khusnaam cha kiwa jop ya ki yakop wa da dep pynman kam chi bynta ka ‘National Voters Day’ kam ka yakop Debate, Extempore, Essay Writing wa ka Slogan Writing. Ki wa jop man ki kamni næ :

Ha ka Debate da jop ka Bymonmiralda Lato na North Liberty Higher Secondary School, pynbood hei wa ar da ka Kossina Khlem na KNGC wa le da yoh da u Wandamebiang Dkhar na ka Thomas Jones College. Yei naam “Most Humorous Speaker” da yoh da ka Bymonmiralda Lato katwa yei naam “Best Speaker” da yoh da ka Kossina Khlem.

nvd-day2

Ha ka yakop “Slogan Writing” da jop da ka Rilana-I-ka Wahlang na ka KNGC ka wa da thoh “I vote because it’s my right, it’s my responsibility and it’s my future”. Hei wa ar da yoh da ka Kossina Khlem na KNGC ka wa a thoh “The system of democracy expects its citizens to vote wisely, truthfully an fearlessly”. Yei wa le da yoh da u Wandamebiang Dkhar na Thomas Jones Synod College u wa thoh “If you want to see the right change then be that change to exercising your right to franchise”

Ha ka yakop Extempore Speech da jop da ka Bymonmiralda Lato na North Liberty Higher Secondary School, bood da ka Roilangki Dhar na KNGC katwa hei wa le da em arngut kitæ u Wanamebiang Dkhar na Thomas Jones Synod College wa u Kyllimot Lhuid na ka Khadar Daloi Law College.

Ha ka yakop thoh essay da jop da u Wandamebiang Dkhar na Thomas Jones College, wa ar da yoh ka Bymonmiralda Lato na ka North Liberty Higher Secondary School wa le won da yoh da ka Rilana-I-Ka Wahlang.

Da pynkut ya ka yalang dei puræ ya ka Voter’s Pledge.

Share this:
Share on Facebook0Tweet about this on TwitterGoogle+0
Advertisement ad1