Jowai : Ynne ka sngi da pynlait paidbah ya ka kot hei yatoh wa ka lehniam Behdieñkhlam ya kawa da tip pyrtuid kam ka “An insight into Behdieñkhlam Festival” kawa da thoh da u Wh. Dawmanchuh Lamar ha Yungwalieh ka Lumiongkjam.

Advertisement ad1

Ya kani ka kot da pynlait paidbah ya ka ha i yalang wa tbian da u Vice Chancellor ka MLCU u bah R.G. Lyngdoh uwa man kam u kongsan katwa u President ka Seinraij Jowai, u ma O.R. Challam kam u symbood kongsan.

Chwa wow sdang ka yalang da yoh yei kyntien pdiang burom na u Ohiwan Lamar.

Hadien ini da yoh yei klam hei yatoh wa kani ka kot da u ma Dawanpoi Passah uwa da khana u wa chim por hadooh kamwa arphaw snem tam wow pyndep ya kani ka kot.

Da yoh yei klam na u nongthoh kani ka kot u Ma Dawmanchuh Lamar heiwa da batai u yeiwa emkaam u thoh ya kani ka kot kam wow yarap pynsñiawthooh ya ki bru wa na bar wow tip ki kayi ka katæ ka Behdieñkhlam. Da ong u leh wa da em leh ki kaam lehniam nadooh wa sdang hadooh wa kut ka lehniam ha kani ka kot. Chooh chooh da ong u wa boon ki bynta wa chitom ki heiwow pynsniawthooh ya ki kyntien Pnar cha i kyntien Phareng.

Ya kani ka kot da pynmih da u Wh. E.M.H. Passah heiwa da pyntip u wa ya kani ka kot da booh sahnaam hei pyrtuid u Dolloi warim ka Elaka Jowai, u Tynde u Wh. K.C. Rymbai.

Da yoh leh yei klam na u waheh chnong ka Loomiongkjam, u ma M. Challam, heiwa da kyntu u ya waroh ki khynnah yow chim ki ka laad wow thoh ki kot ki sla yow ye ki u pynmih ya ki kot hadien habood.

U wh. H.H. Mohrmen kam u Special Guest da ong u wa kani ka kot man ko kawa kordor neibhah da thoh ya ka da u tre næ u bru uwa em ha ka Niamtre weiwa kani ka kot u man ko i myntoi ym du ya kiwa na bar tangwa ya ki tre chnong tre thaw leh.

U symbood kongsan, u President ka Seiñraij Jowai, u wh. OR Challam hei klam yong oo da yaroh u ya u nongthoh wa da ye u wow pynmih ya kani ka kot iwa da chim ya oo hadooh arphaw snem. Da kyntu u leh ya ki khynnah khynroo khyllood wow mih ki chakhmat wow thoh ya i rukom im ka jaidbru.

Hadien wa da pynlait ya ka kot da u kongsan u Wh. R.G. Lyngdoh da e u yei klam heiwa da ong u wa i im i lyngba i ktien ym dei thoh i taar, tæ ini wanrah i yei eh i khoo ya ka jaidbru. Da e u leh yei sniawngooh ya u nongthoh wa da ye u wow thoh ya kani ka kot neibhah ka pateiñ yow rap sñiawthooh yei rukom im yong i.

Chooh chooh da u u Wh. Lyngdoh wa ini toh i kaamram yong ka District Council wa ka Arts and Culture Department yong ka Sorkar wow thoh ya kini waroh.

Ha kani ka sngo da pynlait leh le tylli ki kot kiwa kynthup ya ka U Kba, (Oryza sativa L), Ka Khyndew, Ka Um Bad ka Mariang wa thooh da u wh. Dawmanchuh Lamar wa ka kot wa thoh da ka kong Wanhok Lamar wa e pyrtuid “Ka Dustur ka dei ka ei Vol II”

Yei kyntien e khublei da yoh na u Dawroichuh Challam.

Share this:
Share on Facebook0Tweet about this on TwitterGoogle+0
Advertisement ad1