Advertisement ad1

Jowai: “Ynne man ko ka sngi wow sahkynmoo ya ka ri-loom Jaiñtia neibhah wa khaddooh da yoh u wai ya kani ka thaw puræ ya kawa da angnood ki khynroo khyllood waroh chi kattu” da ong u president ka JSU u R. Parieñ heipor wa wai ya ka Community College yong ka NEHU ha Wahiajer ynne ka sngi.

Ha kani ka yalang wow wai ya kani ka thaw puræ da pyllai ya ka da u Dr. L. Kma uwa da e leh ya ki kyntien pdiang burom ha kani ka thaw.

2ndpara desktop
Advertisement ad1

U Prof. H. Lamin uwa man leh kam u Principal In-Charge kani ka College hei klam yong oo da khana u wa kani ka thaw puræ u tip noh ya ka kam ka Deen Dayal Upadhaya Community College for Skill Development, Wahiajer.

Da ong u wa da sdang ya kani ka thaw puræ toh wow kyrsu thiah ya ki paidbah neibhah wa i khang ya u mooyong ym mut i wa da kut ki laad ki luti neibhah kani ka thaw puræ daw esikai ko ya ki khynroo khyllood ha ki liang wa boon wow yoh khih.

U MLA ka Mowkaiaw u Robinus Syngkon da yooluti u wa kani ka thaw puræ u wanrah ko yei che ym du ha kani ka chnong tangwa ka ri-loom Jaiñtia waroh kawi.

U Prof. S.K. Srivastava uwa man kam u Vice Chancellor ka NEHU da khana u wa u Pandit Deen Dayal man u u bru uwa stat uwa yarap ya ki paidbah ha i liang i puræ puthi wa kiwi kiwi.

Da khana u wa ka thong yong kani ka thaw puræ toh wow pynembor ya ki khynroo khyllood wow yieñ ki ha ki kjat yong ki hi hadien wa chah hikai ki na ka.

Neiliang u Montri ka tnat bordiñ u Sñiawbhalang Dhar kam u kongsan da e khublei u ya ka NEHU wada wanrah ko ya kam kani ka College kawa nyngkong hapoh ka jylla Meghalaya.

Da ong u wa kani ka thaw e sikai daw yarap ko chiboon ya ki khynroo khyllood ka ri-loom Jaiñtia wow seiñ khih ki dei yongki dahi.

Ha kani ka sngi da yoh yei klam na u Waheh Chnong ka Wahiajer u K. Shylla, u MDC ka Wahiajer u H. Phawa wa kiwi kiwi.

Da pynphooh chooh chooh ya ka yalang da ki chaad na ki khon ka chnong Wahiajer, Nangbah kam ki Chaad Pliang, Chaad Pastieh wa kiwi kiwi.

Da pynkut ya ka yalang da ki kyntien khublei na ka Dr. C.R. Diengdoh kawa man kam ka CDC NEHU.

Share this:
Share on Facebook0Tweet about this on TwitterGoogle+0
Advertisement ad1