15 49.0138 8.38624 1 1 4000 1 http://wyrta.com 300

Dang yoh ka Congress yei chaniah na waroh ki 21 ngut ki MLA yong ka: Zenith Sangma

0 Comments

Shillong: Hanlada da dep pynbna paidbah u MLA ka Congress na Ranikor Constituency, u Martin M Danggo yei thmu yong oo wow psiah cha ka National People’s Party (NPP), u Congress Spokesperson, u Zenith M Sangma da kam u wa ki 21 ngut ki MLA ka Congress dang skem hi ki.

“Ha ka Politics ym em iwon iwon wa ye wow ong deiwa tikna wei dang yoh i leh ya i chaniah yong waroh ki MLA ka Party,” da ong u Sangma ynne ka sngi heipor wa yaklam u wa kiwa pathai khubor.

Da ong u leh wa u Danggo toh u bru wa da chemphang ha ka kaam Politics wei daw neh hi u wa ka Congress wei ym leh bakla u wei da em kayi kayi cha lyndet ka wym kwah u khana iwa da wanrah ya ini waroh.

Hawa kylli wa lada ini i leh u Danggo man i i kaam pyrchah Party, da ong u wa daw takit yeiwa leh u wei hadooh kattæ ym pu em e Show Cause Notice cha oo.

Hawa kylli won yeiwa leh khlem burom ya ka lama ka Congress ynnin ha ka yalang paidbah wa pynman ha Ranikor, da ong u wa ini leh da chimkhia ka Party neibhah i pynhiar ya ka lama da man ki kam wow daisarom wei wym burom lada jia ya kawon kawon ka Party wei toh u em i burom markylliang ha waroh ki Party.

Heiyatoh won wa ym em mano ka sorkar Congress wow e Civil Sub-Division ya ka Ranikor iwa man i daw leh wa da thmu u Danggo wow psiah cha ka NPP, u Zenith da ong u ya ka dorkhat wow pynku kyrdan ya ka Ranikor cha ka Civil Sub-Division da e ha ka sorkar wa katni wei da mynjur u leh wa ka Ranikor man sakhiat ko kawa da chah iehdien.

Da ong u leh wa ka sorkar Congress da leh ko kiwa boon ki kaam yow wanrah ya i roi i paar cha kani ka thaiñ heiwa ha u snem 2012 da e District thymme da ka South West Khasi Hills, da booh leh ya ka Police Station kawa pura wei da chna ya ka wi ka Administrative Unit katkam wa kwah u MLA ka thaiñ.

Chooh chooh da ong u wa ha u snem 2017-2018 da dep yoh poisa wow chna sarok na Baghmara cha Ranikor kawa jrong kamwa 138 Km hapoh ka Scheme SARDP-NE tangwa ym em ye u khut Tender neidaw wa slem i kaam wow yoh thaw na ki paidbah.

Heiyatoh won wa da pynwiar ya ka Ranikor Block Congress Committee (RBCC), da ong u wa ki dkhot ka Committee ym embor ki wow pynwiar ka wei du ka District Congress Committee kawa embor wow leh ya ini.

Hawa kylli won ini wa jia toh nei rukom krehkaam u Dr. Mukula Sangma kam uwa yahkhmat, da jubab u deiwa ong wa i yahkhmat ym chong i du ha uwi donhi u bru wei lada em kiwa ym kmen yei rukom yahkhmat ye ki wow wanrah yeini ha ka yalang ka CLP wei ye ki leh u rah hadooh ka khmat ka AICC. Da pteiñ u deiwa ong wa da em ki laad ki luti wa da booh yow leh ya ini wei ym toh u yaklam cha kdong cha chmiang ya kam kini ki kaam.

Heiwi tawon i liang da ong u wa sñiawkhai u yei wym ye kani ka sorkar wow wanrah biang ya ka chong suk chong saiñ wei i khang ya ka Internet da ktah bha ko ya kiwa dang puræ puthi kiwa emkaam ya ka Internet wow pyndep ya ki kaam yong ki.

 

Advertisement ad1

Hadooh 15 kynta pynyinsur ka sorkar ya ki kynt....

Previous

Hadooh T. 25,100 e yarap poisa ka RJPO&FO....

Next

0 Comments

Leave a Reply