Ummulong: Ynne ka sngi ha Ummulong CHC kam chiwynta u pynkhreh ia ki khonboo, ki khynnah khian wa ki waheh ïa i sumar mynkna ïa kiwa jæd ktien wei kaad i wynta poh ktien iwa na neiń iwa tip kam ki bru wa em ïa ka ‘Cleft Lip and Palate’ da pyndep ïa kiwa em hapoh ka Thadlaskeiñ Block da ki doctor yong kani ka CHC.

Ïa ini i sumar mynkna daw leh ha Civil Hospital, Shillong nadooh ka 29 Naichiphaw hadooh ka 2 tarik u bnai wow wan. Ini i sumar da pynbeit pynbiang hapoh ka ‘Mission Smile’. Ïa ki block hapoh Ri-Loom Jaiñtia da sdang ïa i pynkhreh ïa kiwa emkaam sumar ynnin ha Sutnga pynbood da ka Ummulong ynne, ha Amlarem ha ka sngi Depbibar wa daw ha Khliehriat ha ka Sngiwalang.

Ïa ini i sumar ha Civil Hospital Shillong jooh leh chisien chisnem tangwa ha uni u snem katwa dang boon kiwa kwah chah sumar da pynman ïa ka arsien. Ha u Naitung (April) uni u snem da dep pynman leh ïa kani hi ka sumar mynkna ha Civil Hospital, Shillong.

Ïa kiwa kwah u ïoh ïa ini i sumar mynkna emkaam u man ki kiwa 6 bnai chanieñ wei kamjooh leh kiwa chait wa khiah. Ïa ki khonboo emkaam u em i khia pallat ïa ka 5 kilo. Kamwa man kattæ la 35 ngut da man kiwa da biang u chah sumar ïa ki ha kani ka kynti khlem kheiñ sa ïa kiwa na Amlarem, Khliehriat kiwa daw pynman ïa ka screening.

Ïa ini i sumar leh jooh phah ïa kiwa emkaam cha Guwahati ha ka Mahendra Mohan Choudhury Hospital da pyntip ka Dr. H. Suting, Medical Officer RBSK, Ummulong CHC heiwa ïa ki bai lai bai wan bai sah wa i bai sumar da bah khlieh da katai ka hospital.

Chisein chi bnai da phah beit ïa kiwa emkaam sumar da kawi ka kari Sumo na Jowai lada em du arngut donhi leh. Ha uni u snem hadooh u Naitung da yoh sumar la 35 ngut na Ri-Loom Jaiñtia deilang kiwa yoh sumar ha Civil Hospital, Shillong.

Ïa kini wa chah sumar da pyllang ïa ki na waroh ki block deiwa wan ki cha khmat yow chim kabu ïa ini i sumar. Tangwa dang em cha ki kattu katni ki thaw kyntait ki ïa ini i sumar deiwa ong wa ini i jæd ktien toh wa da booh da thaw da u Blai tæ ymhoi u pynkylla yeiwa da e u Blai.

Ka doctor da kyrpad ko lada em kiwa tipmit phi kiwa jæd ktien wow sñaiwbha u pynchlur ïa ki u chim kabu ïa kam kani ka lad. I sumar man i iwa ym em chimpor næ iwa wa maa ïa kiwa yoh ïa ki hynrei man i iwa yarap ïa ki ha i jingim ki yow lait ki na i chah pynjaw pynkthang ha kiwi.

Share this:
Share on Facebook0Tweet about this on TwitterGoogle+0
Advertisement ad1