Jowai: Ki 7 tylli ki Adhoc College hapoh ka lama ka Meghalaya College Teachers’ Association (MCTA), ynnin ka 18 tarik da lai yachem ki wa u Chief Minister u Conrad Sangma ha i thaw sah u. Ha kani ka yachem da kyntu ya u Chief Minister wa ha ki por wa da dep wa 127 ngut kiwa sikai deilang wa ki wakreh (Non- Teaching Staff) kini ki College da e ya ki da ka 3rd Pay wei ha u snem 2012 ya kiwa sikai Adhoc da pynku ya ki cha ka su katkam ka 4th Pay Revision.
Tangwa ini wa da dep da pynmih hukum ka chnat Education Department ka sorkar Meghalaya kawa ong wa ki myntoi ka Revised Pay katkam wa da e da ka 5th Meghalaya Pay Commission wa pynkrehkaam da ka sorkar lyngba ka M.S.(ROP) Rules 2018 ym toh neibynta ki wakreh Adhoc ki thaw puræ.
Neiliang ka MCTA da pyntip ko wa i e sikai haka kyrdan College hapoh ka jylla Meghalaya toh lyngba ki 4 tylli ki College sorkar, 15 tylli ki Deficit College wa 7 tylli ki Adhoc College wa kiwi de ki Private College. Na ki College wa kyrchaan da ka sorkar lyngba ka Grant in Aid, ki 6 tylli ki Adhoc College kiwa da chakri paidbah wow e yei stat cha ki thaaiñ nongkyndong ka jylla.
Kamtæ hadien wa tip chaphang kani ka hukum ka Education Department, ka MCTA ka kyntu ko yaka sorkar wow e leh yaka 5th Pay Revision cha kiwa sikai ha ki Adhoc College yow lait kiwa sikai u sñiaw wa chah leh beiñ ki deiwa pyndooh ya ki myntoi wa toh u yoh naka 5th Pay Revision kiwa da kreh leh ka jooh ka kaam wa kiwi kiwa sikai. Chooh chooh da ong wa heiyatoh wa kiwa sikai Adhoc College da yoh ki yaka tulop wa kynthup yaka Basic Pay waka Dearness Allowance donhi, ka sorkar da yarap ko deiwa kyrchaan ya ka 75% ka tulop hei dur ka Grant in Aid katwa kawa sah 25% da hap wow su da kiwa pynlai ya ki College.
Ka General Secretary ka MCTA da pynkynmoo ko ya u Chief Minister yei kular yong oo wow pynku yaka kaam puræ puthi wei emkaam leh wow tipmit yei kreh chitom kiwa sikai ha ki Adhoc College.
Discussion about this post