Advertisement ad1

Mairang: Ka Dorbar Chnong Umthied Bynther chirup wei krehlang wa ka Dorbar Chnong Pyndengumiong Mairang West Khasi Hills District, ynne ka sngi da pynman ki ya i lai paidbah (Rally) neibynta wow beiñ ya uwa tynyap khiar ya kawi ka dongkhian wa dang 7 snem i rta na chnong Umthied Bynther wei kamjooh wow beiñ leh ya ki 3 ngut kiwi kiwa emkti wow slaitbor ya kawi ka khynnah kynthai kawa dang hapoh ka 18 snem i rta kawa na ka chnong Pyndengumiong, Mairang.

Ha katai ka lai paidbah kiwa chong chnong yong ka thaiñ Mairang kiwa em palat 3 hajar ngut kiwa mih paidbah chirup wa ki khynnah skur yong waroh ki skur kiwa em ha ka thaiñ Bynther kam ka dak wow pynsñiaw ya i sñiawkhia wei wow beiñ ya kiwa slaitbor wa uwa tynyap bru deiwa dawa wow pynchitom ya ki.

Advertisement ad1

Ya katai ka lai paidbah da sdang nadooh ka chnong Nongbah Bynther ter ter chadooh Mairang wei manda poi ha Mairang ki paidbah ka thaiñ Mairang da wan chimbynta leh sa kiwa yah Auto Rickshaw yong ka thaiñ Mairang kiwa da bood lang nadien yong ki paidbah wow lai soodong ka chnong Mairang wei da pynkut ya ka tai ka lai paidbah ha ka madan Mawlum kawa toh leh ka thaw pynman ya ka yalang paidbah.

Ha ka yalang paidbah kawa da pynman ha ka madan Mawlun da pyllai da u Bornard Syiemiong Sordar ka chnong Pyndengumiong hei emlang u Lambok Nongrang General Secreatary ka chnong Pyndengumiong, u Lakher Syiemlieh Sordar ka chnong Umthied Bynther, ka Agnes Kharshiing president ka CSWO, ka Angela Rangad, TUR, u Daniel Syiemlieh Secretary chnong Umthied Bynther, ki waheh yong ka thaiñ, ki seiñbhalang waphær waphær wa kiwi kiwi. Ha chwa wow sdang ya ka yalang da pynman leh ya ka suki wa chi minit kam ka dak wow pynyoo yei sñiawlang.

Kam wow pynkynmoo wa itai i chah tynyap khiar ka khynnah wa dang 7 snem i rta ha i kti u ma yong ka na ka chnong Umthied Bynther kawa jngai kamwa 3 KM na Mairang wei ha ka tai hi kajooh hi ka sngi sa kawi ka kynthai na ka chnong Pyndengumiong da chah slaitbor ko ha ki 3 ngut ki bru kiwa da patah yabor chapoh ka Auto Rickshaw wei da kit ya ka cha ka chnong Bynther.

Neiliang yong u Sordar ka chnong Umthied Bynther u Lkher Syiemlieh hei klam yong oo da ong u wa toh u sñiawbha u elaad ya ki khynnah chynrang wa kynthai wow im ki neibhah ki man ki ka mynried ka ri.

Chooh chooh da ong u wa neiliang ka Dorbar Chnong Umthied Bynther ka beiñ joor ko ya uni uwa tynyap kamjooh ya kiwa slaitbor. Da kylli “Iyi i daw wa kini ki jait kaam roi ki ha Ri Khasi wa maya yong I.” Heijooh i por da kyntu u leh ya ki bei ki pa wow pynlut por ki wow sneiñ ya ki khon ki kti neibhah lada ka manyung tlot ko yeini, ki khon ki kti daw jied ki da ka luti wa sih.

“I leh haap i u mih paidbah ynne ka sngi hawa da dep jied ya kiwa mihkhmat kiwa da thung ya kiwa kreh sorkar kiwa toh u pait ya kini ki kaam wei hadien kiwa emkti ki lait ki u mih neibhah ka poisa ye ko u thied yei laitlooid yong kiwa emkti” da ong ka Agnes Kharshiing hawa klam ko ha kani ka yalang.

Ka president yong ka CSWO da ong ko leh wa ki bor yong ka aiñ toh u bichaar hok ki neibynta kani ka kynthai wa chah slaitbor ha ki 3 ngut wa uwa tynyap ya kawa dang 7 snem wei ka aiñ toh u pynchitom deiwa eh wei kini ki kaam chah lehbeiñ ki kynthai ym ktah ko du ha kiwa ha yung ha sem kiwa chem ya iwa jia da ktah ko leh ya ka imlang sahlang hi waroh kawi.

Katwa neiliang yong ka Angela Rngad President ka TUR, da ong ko wa kat kini ki paidbah kiwa mih wow beiñ ya kiwa emkti u leh ya ki kaam ksuid pynyoo wa dang em i mynsien bru ha ka jait bru wei u pyndooh jait noh ya kini ki jait kaam.

Kiwi kiwi de kiwa klam ha kani ka yalang kynthup ya u Lambok Nongram, ka Caceydora Nongsiang Vice President ka KSU Girls Wing wa kiwi de kiwa klam ya jooh ki kyntien wow dawa u pynchitom joor wei wow kset patok waroh chi rta ya kiwa em kti wei ym hoi u yohlaad ki u im dei suk.

Share this:
Share on Facebook0Tweet about this on TwitterGoogle+0
Advertisement ad1