15 49.0138 8.38624 1 1 4000 1 http://wyrta.com 300

Dawa u PN Syiem 20% na waroh ki Work Order wa e lyngba ka T. 28 Klur : HS Shylla

0 Comments

Jowai: Hawa klam ha ka Dorbar wa kyrpang yong ka KHADC neiliang u CEM wa thymme ka Council, u HS Shylla da e khublei u ya ki lok MDC ka KHDA kiwa da yoobiang ya oo wow chimkti u ya i kaam CEM. Heijooh i por u Shylla da kynthah u leh ya i pep ki MDC ka PDA wow wan pynyoo bor deiwa ong wa tieñ ki neibhah wa ka kyrtong CEM (Grace Mary Kharpuri) da maham ko wow ekti wow takit cha ka CBI hajrong i pynemkaam ya ka T.28 klur da u CEM warim ka Council.

Da pynbaad u wa u CEM warim, u Pynshngain N Syiem da boonkaam u du wow pynlang poisa neibhah wa dawa u 20 percent na waroh ki Work Order wa da e u lyngba kani ka T.28 klur, wei da pynrap u wa u Pynshngain neibynta ka poisa da tyrwa u ka cha ka UDP tangwa ka UDP ym pdiang ko ya ka. Da pynrap u deiwa ong  wa lada 20% chim u Pynshngain, itæ mut i wa na ka T. 28 Klur u Pynshngain da kamai u T. 5.6 lak.

Da beiñ chooh chooh u ya u PN Syiem wada yakrehlang wa ki MDC ka Congress khlem kynjoh ktien ya ki party kiwa kyrchaan ya ka EC u wa yahkhmat da ka PDF, neibhah wa heipor wa khut wow embynta wa ka AD Rules Committee ka Congress ym em phah ko ya ki dkhot yong ka wei u PN Syiem da ong u ha katu ka por wa ym emkaam ya ka Congress katwa katni won wa sñiawthooh u yeini da dooh u yei chaniah na ki MDC wei da u khut lang noh u ya ka Congress.

Da pynbaad u leh wa ki MDC ka Congress wa man ki kiwa stiñ bar ya ka sla dieñ wei khlem beh ka la-ær leh da hær ki.

Da ong u wa nadooh wa chna ya ka PDA da sdang chah pdiah nyngkong ko (PDF) deiwa jied ya uwa yahkhmat ka Parliamentary Party (PP) ka party deiwa pyndam noh ya u PN Syiem wei da thung won da u James Ban Basaiawmoit. I chah pdiah wa ar won toh wa ieh noh u Pynshngain ya ka kaam CEM khlem nood wow pynyoo bor.

U Shylla da dawa u leh na u Chairman warim, u LG Nongsiej wow pynche yei daw wa ieh kaam u syndet chwa wow pynyoo bor ynnin ka sngi khnang wa ki paidbah ym beiñ ki ya ka District Council, deiwa pynrap leh wa lada u chairman warim ymye u wow pynche da toh wow dam wow chah ya oo wow wan u cha ka Dorbar.

Lai chimbynta ki 7 ngut kiwa yalehke ka WJDBA ....

Previous

Da i thang mombati ha Shillong da kynmoo warom....

Next

0 Comments

Leave a Reply