Advertisement ad1

Jowai: Ka election ha u snem 1978 cha ka yung dorbar chna aiñ ka jylla Meghalaya da man ko ka snem yong ki “Le Lama” wei kani ka election leh man ko kawa ar heiwa kawa nyngkong da pynman ha u snem 1972.

Ha u snem 1978 hadien wa da dep ñiaw vote, ka APHLC da yoh ko 16 tylli ki chuki, ka HSPDP da yoh ko 14 tylli, 8 ngut won toh da rah da ki kyrtong samen wei ka PDIC won da yoh ko artylli ki chuki. Ka INC won da jop ko 11 tylli ki chuki na ri-loom Garo, 9 tylli na ri-loom Khasi katwa na Jaiñtia Hills ym em yoh ki tang ka iwi leh.

Advertisement ad1

Manda kheiñ da chem wa du ki seiñ ri-loom da yoh ki hadooh 32 tylli ki chuki wa kynthup lang wa ki 2 tylli na ka PDIC. Kamtæ, da mih ka yakhih wa toh u lumlang ya kini ki seiñ wow pynbor ya ki wow yakrehlang lang ki.

Ha ini i por u H.S. Shylla uwa yahkmat ya ki khynroo uwa katni man u kam u MDC ka Nongkrem da yieñ u ha khmat yung ka Legislative Assembly wei da kbai da kyriaw yei dawa wa ki seiñ ri-loom toh u yachem ki wei wow krehlang lang ki.

Kamtæ da yachem ha kamra ki Ruling Party (Room No. 14). Ka yalang da neh ko waroh chi miet wei da emlang leh u E.K. Mawlong (IND). Ka yañia kawa joor toh u yi wow ksoh yei kyrdan Montri Rangbah (Chief Minister), u e cha ka APHLC namo cha ka HSPDP?

Kam wow pynkynmoo hadien ka Election 1972, da synchaar da ka APHLC kawa yoh 32 tylli ki chuki. Tangwa u Capt. W. A Sangma du ha u Khonchonglad (November) 1976 da kylla seiñ noh u wei psiah noh u cha ka INC deilang wa ki kattu katni ngut ki MLA yong oo tangwa 4 ngut wown ym em bood ki ya oo wei da neh ki wa ka APHLC. Kini toh u S.D.D. Nichols Roy, u B.B. Lyngdoh, u P.R. Kyndiah wa u D.D. Pugh.

Hapyrdi ka yañia wa joor bha da mih i tyrwa wow pynkhle nasib yei kyrdan u Montri Rangbah. Da mynjur yeini tangwa emkaam wow yabhah kaam chwa (allotment of portfolios) wei ya ini leh da mynjur lang. Ki kyndon toh wa uwa yoh ya i kaam Montri Rangbah ki portfolio u man ki kamwa da dep pynbait chwa wei kamjooh leh ya ka seiñ kawa yoh yei kyrdan Symbood Montri Rangbah (Deputy Chief Minister), u neh ki portfolio kamwa da dep yabhah.

Hadien wa pynkhle nasib ya i kaam Chief Minister da yoh ka APHLC iwa mut uwa yahkhmat ka seiñ APHLC u yoh u wow ksoh kam u CM wei ya Dy. CM da lai ko cha u wa yahkhmat ya ka HSPDP.

Hadien ini da tyrwa ya u D.D. Pugh kam uwa mihkhmat ka Parliamentary Party yong kini ki seiñ ri-loom waroh “Le Tylli”, iwa mut wa Pugh u man u kam u Chief Minister.

Da pynsmai ya u D.D. Pugh kam u Chief Minister, ha ka 10 Wisu 1978 wa ya u S. D. Khongwir kam u Deputy Chief Minister. Kiwi kiwi de ki Montri toh u M.N. Majaw, P.R. Kyndiah, Dr. B. Pakem, J.D. Pohrmen, B.W. Momin, Y. Fuller Lyngdoh, H. Hadem wa u E. Iawphniaw.

Kani ka “Sorkar Le Lama” da neh ko du 11 bnai. U D.D. Pugh, Chief Minister da iehkaam (resign) u ha ka 21 Thohlakhmi (February) 1979 deiwa kyntait noh ya ka HSPDP. Da pynsmai biang ya u D.D. Pugh kam u Chief Minister ha kajooh hi ka sngi (21-02-1979) deiwa chim du ya ki dkhot ka APHLC wa ka PDIC.

Kani toh katkam i kynmo u S. D. Khongwir Ex. MLA 1972 – 1998

Share this:
Share on Facebook0Tweet about this on TwitterGoogle+0
Advertisement ad1