Advertisement ad1

Jowai: Ka Pdengshakap Primary Health Centre (PHC) kawa sdang nadooh u snem 2001 pait ko ya ki 38 tylli ki chnong kiwa boon wa haap hapoh ka Elaka Satpator wei em ko du 8 tylli ki thaw thiah ya ki chynrang wa kynthai heiwa da ood kiwa thiah kjut neibhah da haap thiah ki cha khyndaw wei manda boon kiwa thiah kjut da haap thiah ki kat chawa yoh thaw.

Kiwa thiah kjut leh ong ki wa ka yung man ko kawa pai um wei manda slap haap diang um ki da ki borti.

2ndpara desktop
Advertisement ad1

Kiwa kreh ha kani ka PHC da ong ki leh wa ka kor pynchit ya ki khonbo (Baby Warmer) wa dang kha toh ko wym krehkaam da slem wei haap pynemkaam da ka heater wei lada bakla daw iñ ki that ki nep. Wei kiwa kha khon da em bait ki 3-4 ngut chi tayaw.

Kamwa man kattæ em du ar ngut ki doctor wa kreh ha kani ka PHC wei chem chitom ki wow pait ya waroh kiwa kjut wei jooh em ki le ngut tangwa uwi da lai puræ bniah u. Ki Staff Nurse leh em du 2 ngut donhi kiwa haap kreh aw jan 24 kynta chi sngi wei da yoh yarap ki na ki ar ngut Nurse kiwa kreh Contract Basis.

Yow e Birth Certificate leh da em du kawi kawa kreh LDA kawa haap kreh ya kiwa boon ki kot ki sla wa emkaam ka PHC, kamtæ man ko kawa eh bha ya ka wow pyndep kaam. Ki post yong u HE wa UD la chi snem ym pu em thung wakreh ka sorkar.

Da pyntip leh ki Quarter wa thymme wa sah kiwa kreh man ki kiwa pai um wei da haap yasah ki boon ngut ha kawi ka Quarter.

Wei kattu la le bnai kiwa kreh kani ka PHC ym pu em yoh tulop ki.

Kamtæ da dawa wow chna pynmiat noh ya kani ka PHC neibynta kiwa thiah kjut, kiwa wan thooh dawai wa kiwa kreh.

Neiliang u Waheh Chnong u Forward Shylla da ong u wa da dep e dorkhat ki cha ka sorkar ha snem 2015 yow pynchna thymme ya kani ka thaw sumaar kamjooh wow pynboon leh ya kiwa kreh yow ye u e chakri wa biang cha ki paidbah tangwa hadooh katni ym pu leh iyi iyi leh hei yatoh wa ini.

 

Share this:
Share on Facebook0Tweet about this on TwitterGoogle+0
Advertisement ad1