Jowai: Ka Blood Bank Civil Hospital Jowai kawa em ha Panaliar, katte em ko ha i jingeh wa khroo bha neidaw wa duna kiwa wan e snam khamtam ia ki Blood Group ‘O’. Ini i duna snam da booh ko ia kiwa kjut kiwa emkaam snam ha i ma wa ye ki u dooh ia i jingim iong ki lada ki paidbah wa boon ym wan e snam ki yow pyndap ha thawpyllang kawa duna bha katni. U Dr. H.S. Nongbri uwa peit ia kani ka Blood Bank ong u i wan e snam ymtoh iwa chimpor. Ong u du 30 minit da dep nadooh u test hadooh wa u tan ia i snam. Da khana u leh kiwa kreh hapoh kani ka blood bank leh na ka por cha ka por da e snam ki. Kamtæ da kyrpad u ia ki paidbah ymtoh u tieñ ki u wan e snam neibhah ym ktah ko ia i chait i khiah iong ki.

Kam wa man kattæ waroh ki hospital hapoh ka distrik chaniah snam ki na kani ka Blood Bank. Lada em iwa jia heiwa boon ki bru wa mynsoo ha kajooh ka sngi kani ka blood bank ym ye de ko u pynbiang snam ia ki.

Da khana chooh chooh u doktor wa em ki por wa ki wa kjut khlad noh ki han lada ioh snam ki neini na Blood bank, ha kam kitea ki  por ym jooh ye de ki u pan kylliang na kiwa ha iung ha sem ia i snam wa da dep pynemkaam. Ha kini ki sngi wa dang dep da dep pynlut 5 unit lane 2250 ml ha kawi ka bru, tangwa sih bhah iap noh ko, kam ha kani ka kynti ka Blood Bank ym ye de ko u ioh kylliang na kiwa ha iung ha sem kani ka bru. Ini i e kylliang ia i snam toh i wa leh ka Blood Bank yow ye u pynneh ia ki stock deiwa ki bru wa ioh snam na kani ka Blood Bank kiwa ha iung ha sem iong ki hap ki u su kylliang deiwa wan e snam cha ka Blood Bank. Ia i snam wa ioh na kani ka Blood Bank ymtoh kawa ki paidbah duk ki u su chi tyngka leh.

Ka JSU leh ha kani ka sngi da lai iachem ki wa u doktor Nongbri iow pynsakhiat ia ini i duna snam kani ka Blood Bank. U president u ma Rikut Parein da ong wa hadien wa dep iachem wa u doktor, ka seiñ da rai ko u pynman noh da ki ‘Awareness Campaign’ wa ki ‘Blood Donation Drive’ yow pynsniawthooh ia ki paidbah ia i emkam u e snam ha i jooh i por iow pynchlur ia kiwa ym jooh e snam iow wan ki cha kahmat iow e snam ki. Neibhah deiwa leh ki ia ini ye ki u iarap pynim ia ki bru kiwa em ha i chitom wa boon jait.

 

Share this:
Share on Facebook0Tweet about this on TwitterGoogle+0
Advertisement ad1