Advertisement ad1

Jowai: Katwa i yaklam pynbait pood ha pyrdi ka Meghalaya wa ka Assam dang lai i, ki paidbah wa sah ha Block-I ka Jaiñtia Hills dang cha leh beiñ ki ha ki Karbi. Katkam ka khubor wa phah da u N. Sutnga na Moojem da ong wa ha kani ka 23.04.17 ki bru Karbi da wan boon ngut wow tympra ya ka yung ka Kahelem Bhoi wa u Minot Sutong ha chnong Madan Nongkylla khlem em iwon iwon leh i daw.

Ki dkhot yong ka Labang Nongphyllut Pangam Raliang Council (LNPC) ka seiñ wa yaleh ko wow pynwan biang ya ka thaiñ Labang-Nongphyllut wa Pangam Raliang na Mikir Hills (wa tip Karbi-Anglong katni) wei ka leh da yakhih pyrchah ko yei leh ka Sorkar Assam wow pynkhlaad ya kani ka thaiñ na Jaiñtia Hills wow pynyabi yabor cha ka Mikir Hills ha u snem 1951. Hei yatoh wa ini ka seiñ da chong pyrkhat ko ha ka Executive Meeting yong ki ynne ka sngi 11.05.2017 ha Jowai.

2ndpara desktop
Advertisement ad1

Ha kani ka chong pyrkhat yong ki dkhot ka LNPC, da sñiawthooh wa na i liang ki Khasi ki Pnar kiwa chong wa sah ha kani ka thaiñ ki ym chah jem ki wei ini i chah tympra ya ki thaw sah ki Pnar ha ki Karbi wei kiwa leh ya kani ka kaam daw yoh bainong ki da iwa biang.

Chooh chooh da ong wa kamwa man katni ka thaiñ Labang-Nongphyllut wa Pangam Raliang ya kawa da kam ka Block I, dang haap ko hapoh ka yaknieh pood ha pyrdi ka Meghalaya wa Assam wei kiwa chong ka thaiñ ym em ki hapoh kawon kawon ka sorkar kawa pait ya i chah lehbeiñ yong ki Khasi ki Pnar kamtæ kiwa cha lehbeiñ ym emlaad de ki deiwa lait noh deiwa chim ya ka aiñ ha kti yong ki pyrchah ya kiwa lehbeiñ ya ki.

Neitæ da ong wa hajrong ini jia chah tympra yung, na i liang ki Khasi ki Pnar kiwa chong wa sah ha Block-I, da pynbeit ki wa hapoh uni u bnai daw pynman ki da ka Dorbar Pyllun hapoh ka thaiñ wei wow pteiñ yei dawa wow pynuiñ biang ka Assam ya kani ka thaiñ cha ka Meghalaya kamjooh leh ya ka sorkar Meghalaya wow pynkhor ko ka, ka sorkar Assam.

Da pyntip leh wa da dep jied ya ki bru wow lai yachem wa u Montri Rangbah ka Jylla Meghalaya ha kini ki sngi wa daw wan.

Share this:
Share on Facebook0Tweet about this on TwitterGoogle+0
Advertisement ad1