15 49.0138 8.38624 1 0 4000 1 https://wyrta.com 300 0

Hadooh 65 tylli ki Rot wa pynpoi haka sngi khadooh ka Behdieñkhlam ka Tuber

0 Comments

Jowai: Ka Behdeiñkhlam ka Seiñ Raij Tuber man ko kawi na ki Behdeiñkhlam wa heh dooh ha ri-loom Jaiñtia, wei da poi ko cha wakut ynne ka sngi kawa sdang nadooh ka 19 tarik uni u bnai ha Tuber Kmaichnong East Jaiñtia Hills District, hapyrdi i phooh i phieñ ki Rot kiwa da wanrah hapoh ka Syiem Aitnar.

Ka lehniam Behdeiñkhlam kawa leh da ki khon ka Niamtre toh yow beh yaka khlam, i kjut i chitom, ki bor pynjæd pynpra ki bor ka rymaw wa ki sñiawsih wa boonjait haka imlang sahlang.  

Ynne ka sngi da wan sakhi ya kani ka lehkmen da u Chief Minister ka sorkar jylla u Conrad K Sangma, ki montri wa kynthup ya u Sñiawbhalang Dhar, u Kyrmen Shylla uwa man leh u MLA ka thaaiñ, u Wailadmiki Shylla, MLA ka Jowai Constituency, u Shitlang Pale, MLA Sutnga Saipung Constituency, u Thombor Shiwat, CEM JHADC, ki MDC, ki sahep sorkar wa kiwi kiwi.

U Conrad K Sangma hawa e yei klam, da e khublei Behdeiñkhlam u ya waroh deiwa ong wa kani ka Behdieñkhlam man ko kawi na i lehkmen wow yoosuk wa phooh wa phieñ dooh haka jylla. 

“Ka sorkar ka yieñ ko neibynta u paidbah, i ngait skem i wa ka hok ki paaid ri-loom wa ka riti dustur u yoh ki yei yada wa i pynneh pynsah. Wei deiwa em kam kini ki lehkmen i yoh i yei tipmit wa i man i kiyi,” ong u Conrad.

Da ong u leh wa ka sorkar na i por cha i por ka e kyrchaan ya kam kini ki lehkmen wei u pyntikna leh wow pteiñ ki u yoh yarap haki snem wow wan yow pynbha pynmiat chooh chooh ya ka lehkmen Behdieñkhlam. 

Ha i jooh i por da ong u wa ka sorkar ka kyrchaan ko ya ka hok ki bru yong i, heiyatoh wa ki rukom mantre ya ka khyndaw ka chyiap, ki mar pohkhyndaw, ki riti dustur neidaw kini wanrah ko ya i wow yoh i yei tipmit. 

Neiliang u MLA ka thaaiñ u Kyrmen Shylla, da yooluti u wa lyngba kani ka lehkmen ki paaid ka Seiñ Raij Tuber daw yoh ki yei kyrkhu wa i chait i khiah haki snem wow wan, wei deiwa wan ki da i mynsien wa ngait wow ngooh wow dem, u Blai leh daw theh u yei kyrkhu.

Ki khon ka Seiñ Raij Tuber naki chnong waphær waphær wa kynthup na waroh ar ki District ka East wa West Jaiñtia Hills da chimbynta chongchit ki ha kani ka chaad deilang wa ka sur ki bom ki bhuri hawa wanrah yaki Rot hapoh Aitnar.

Ha uni u snem da tam 65 tylli ki Rot wa da wanrah naki chnong waphær waphær kiwa emlang wa ki khubor ya ki paidbah yow yakhun pyrchah ya chiboon ki kaam sih hapoh ka imlang sahlang wow yada na u khniang HIV, ya yait ya i dih drugs, i dih kiad kamjooh yow lait na i chah kdoh ha ki Social Media, wow yakhun pyrchah yei pynkrehkaam ya ki khynnah, nalor wow kyntu leh wow man kiwa lehkhooid wei wow yada ya ka rymaw. 

Chwa ini leh da e dorkhat ha u Conrad K Sangma kamjooh ha u Kyrmen Shylla neibynta wow chna yaki thaw paitke u chna ya ka Museum, Cultural Centre, ki paikhana wei wow yoh yarap man u snem neibynta wow pynkhooid chnong cha waroh kiwa chimbynta haka Behdieñkhlam, kamjooh leh haki thaw lehniam waphær waphær, nalor wow e yarap wow kær ya u mot sahnam u Woh Tep Kyndait.

Photos By: R. Shadap & SD Laloo

0 Comments

Leave a Reply