Advertisement ad1

Jowai: Ynne, hapyrdi u slap wa joor da wan da ki spah ki paidbah wow sakhi ya u Montri ka tnat C&RD u Sniawbhalang Dhar wa wan booh u ya u Moo-Yurim yong ka Wapung C&RD Block ha ka yalang wa pynman ha Wapung HS School, Wapungskur, East Jaiñtia Hills.

Ha kani ka sngi u MLA ka thaiñ u Justine Dkhar da man u kam u symbood kongsan.

Advertisement ad1

Hei klam na u Waheh Chnong ka Wapungchnong, u Glitter Rymbai; u Waheh Chnong ka Wapungskur, u Satly Ryngkhlem da ong ki wa ini i wan ka Block hapoh kani ka chnong daw pynsuk ko ya ki paidbah ha ki kaam yong ki.

Da yoh leh ya ki klam na ka Director ka tnat C&RD ka I. Sangma kawa da khana wa da booh kamwa T. 25 Lak wow chna ya kani ka yungkrehkaam kani ka Block katwa u DC ka East Jaiñtia u MS Lhuid da batai tbian u chaphang i kyrriah ya ka Khliehriat Block cha Wapung.

Hei klam kam u symbood kongsan u Justine Dkhar da ong u wa kani man ko kam ka wow pynbaptis ya kani ka Block na ka Khliehriat C&RD cha ka Wapung C&RD Block, wei yooluti u wa kani ka Block daw ku ko kat dang lai ki por ki sngi.

Kam u kongsan u Sniawbhalang Dhar da ong u wa ka Block toh kawa kyrpang neibynta kiwa na nongkyndong.

Da ong u leh wa da jied ya ka Wapung toh neidaw wa man ko hapyrdi yong ki 105 tylli ki chnong kiwa em hapoh kani ka Block.

Ha kani ka sngi da yoh ya i rwai pdiang burom na ki khynnah ka Wapung Higher Secondary School, i chaad na ki khynnah ka Step By Step Secondary School, ka KB Memorial Secondary School, wa kiwi kiwi.

Da pynkut ya ka yalang da ki kyntien ekhublei na u BDO kani ka Block u C.P. Mawkon.

Advertisement ad1
Advertisement ad1