15 49.0138 8.38624 1 1 4000 1 http://wyrta.com 300

I daw wa sah ka scheme bai baam tymmen toh neidaw wa duna poisa ka sorkar: Kyrmen Shylla

0 Comments

Shillong: U Montri ka tnat Social Welfare ka jylla, u Kyrmen Shylla da ong u wa ka sorkar da chimkhia bha ko wow pynlait noh ya ka Chief Minister Social Assistance Scheme (CMSAS) kawa da sahkut kattu la palat chi snem.

Hawa yaklam wa u Kyrmen, da ong u wa ka sorkar da phah ko ya ka tnat wow chna ya ki laad ki luti wow pynlait noh ya kani ka e yarap cha kiwa tymmen, wa kiwi kiwi kawa da sahteiñ la chi snem kattu.

U Kyrmen da ong u leh wa u Montri Rangbah ka jylla, u Conrad K Sangma da chimkhia u ya kani ka kaam katwa ye wei da phah ya ka tnat wow pynlait smat noh ya ka poisa.

Katkam wa ong u Kyrmen, ka tnat Social Welfare da pynkhreh ko chaaid chaaid wei mar yoh ya ka poisa, daw pynlait noh cha kiwa toh wow yoh.

Ka Chief Minister Social Assistance Scheme (CMSAS) toh kawa neibynta wow e yarap cha ki tymmen, ki kynthai wa yap kurim, kiwa duna ha i doh i pran nadooh u snem 2015 tangwa ha u snem 2017 hadooh katni ym em pynlait ya kani ka scheme.

Hajrong ini da dawa wow pynku noh ya kani ka scheme neiliang u Montri da ong u wa ya ini dadep yaklam bniah ha ka yalang ka dhab ki montri heiwa nachwa kiwa duna ha i doh i pran yoh ki duna ya ka T.500, tangwa katni da pynku cha ka T.1000 chi bnai.

Chooh chooh da ong u wa da em i dawa wow pynku hadooh T.3000 ha kani ka scheme tangwa ka sorkar daw haap pait wei bichaar bniah bha ko yeini wei ympu ye u e kawon kawon ka kular deiwa ong leh wa ka sorkar kwah ko wow pynlait lut ya ka poisa neibynta kani ka scheme neibhah wa man ko ka hok ki paidbah, tangwa chong won i ha i em poisa.

Da ong u leh wa i daw wa sah kani ka scheme toh neidaw wa duna poisa ha ka sorkar deiwa pynrap leh wa hanlada daw chimpor ko tangwa ka sorkar daw yaleh ko wow pynlait lut ya kani ka scheme.

“E laad ya i kattu katni por, wei lada em poisa, kwah i wow pynlait noh ya ka neibhah wa man ko ka hok ki paidbah,” da ong u Kyrmen.

Ye wow pynkynmoo heini wa em kamwa sanphaw hajar ngut tam ki bru ha ka jylla kiwa toh wow yoh yarap na kani ka scheme kiwa da dooh ya ka kattu la chi snem.

Sdang ka Meghalaya’s Got Talent Season 3....

Previous

8 tylli ki dhab wow chimbynta mynstep ha ka Me....

Next

0 Comments

Leave a Reply