Advertisement ad1

Changpung: Chirup waka pyrthai hi waroh kawi, ka ophis iong ka District Social Welfare WJHD deilang i ia kreh lang waka dorbar chnong Changpung da pynem warom ki ia ka sngi kyrpang iong ki tymmen kawa tip kam ka “International Day of Older Persons” kawa da pynman ha uni u snem hajrong ka phang “Sustainability & Age Inclusiveness in the Urban Environment”.

Ia kani ka sngi kyrpang iong ki tymmen da rai wow leh warom ia ka man u snem da ka United Nation ha ka General Assembly kawa da dep man ha ka 14 tarik December iong u snem 1990. Ha u snem wa bood u 1991 wan da leh warom ia ka da waroh ki ri ka pyrthai.

Advertisement ad1

Yeini i leh warom ynne ka sngi da pynman ha ka iung skur Shangpung Higher Secondary haka chnong Changpung hei emlang chirup u ma K.M. Lytan MDC Changpung kam u kongsan, ka kong Z.J.Lyngdoh District Social Walfare Officer Jowai, waki tymmen kiwa man ki nongchong chnong wa pura kiwa da rim ka chnong.

Hachwa ka ialang leh warom neiliang ka DM&HO Jowai waka PHC Shangpung da pynman chwa ki da ka Medical Check Up kam ia ka Blood Pressure, ka check chini wa kiwi kawa da leh makna ia ki tymmen kiwa wan cha kani ka ialang ynne ka sngi. Ki tymmen wa em ynne ka sngi da em ki 152 ngut.

Ka kong Z.J. Lyngdoh District Social Walfare Officer Jowai, ha ki kyntien yahkhmat iong ka da ong ko wa katkam i peit jngai iong ka WHO, da ong ki wa ha u snem 2050 ki bru kiwa em  palat 80 snem i rta daw ye ki u ku chadooh ka 395 million.

Da batai ko ia ka National Policy iong ka sorkar India, kawa da pynbna paidbah ha u snem 1999. Da ong ko wa katkam ka National Policy iong ka sorkar India, ki jylla waroh hapoh ka India toh u em ki ki ophis kyrpang nei wynta ki tymmen khnang wow kyrchan ne kyntu  pynbha ia ki neiliang ka poisa wa ka bam ka dih, i chait i khiah, ki thaw chong thaw sah, wakiwi kiwi ki emkam iong ki tymmen.

Tangwa ha Meghalaya wan ym ye ki booh ia kani ka ophis kyrpang neibhah ka sorkar jylla wa em ko hei duna poisa, hynrei ia ki kaam kiwa iatoh wa ki tymmen katni da pynkit ia ki ha ka Directorate of Social Walfare.

Ha u bnai Duiatra 2014 ka tnad Ministry iong ka Social Justice da kyrpad ko ia waroh ki Chief Minister wow chna ki dei iong ki hi ki State Policy nei wynta ki tymmen.

Da batai haroh ko hei iatoh waka Maintenance and Walfare of Parent and Senior Citizen Act 2007 kawa da dep mynjur da ka iung dorbar ka India. Na ka liang ka sorkar jylla da pynkrehkam ko ia kani ka aiñ nadooh u Naikhynnde 2012 heiwa da thung leh iaki Maintenance Tribunal ha man ki distrik iong ka jylla.

Da ong haroh ko wa ha Meghalaya hadooh katni dang em duuh 2 tylli don hi ki iung chong iung sah iong ki tymen, kawi toh ka Mercy Old Age Home ha Shillong kawi wan ka Old Age Home ha Tura.

Da batai haroh ko ia ki skhim nei wynta ki heh ki san kiwa ye u ioh na ki Block kam ka National Indira Gandhi Old Age Pension, Indira Gandhi Disability Pensioner, u kho Apurna uwa ye u ioh na ka tnat Supply, ka Chief Minister Special Assistance skhim kawa ye ki u ioh 500 tyngka man ka bnai waka ka skim Medical Treatment For the Disabled na ka tnat social Walfare. Da ong chooh chooh ko wa nadooh u snem 1999 hadooh katni 541 ngut ki tymmen da ioh ki ia ka Medical Treatment ia ki kjut kiwa khian.

U ma K.M. Lytan kam u kongsan ong u wa ymtoh u burom don hi iaki wa da tymmen duh kam kani ka sngi kawa man ka sngi kyrpang iong ki, hynrei u burom kyrpang ia ki kam wa khro kiwa ki da leh ki heipor dang chait dang khiah ka met ka phad ki iwa da ringdur iaka imlang sahlang ka chnong ka thaw kawa em katni.

Kam ka dak i burom ia ki heh ki san ha kani ka sngi, neiliang ka sorkar lyngba ka tnad Dristrict Social Welfare da sam thad kup ki ia waroh 152 ngut ki wa em ynne ka sngi.

Ia ka ialang da pynlai da u ma P.H. Phawa Chairman chnong Changpung Mission, da ioh leh yei klam tbian na u ma S. Suchiang Waheh Chnong Changpung Pohshnong na u ma Frankincense Dkhar Waheh Chnong Changpung Mission.

Da pynkut ia ka ialang dei kyntein e khublei na ka kong Y. Tyngkan CDPO ICDS Laskein.

Share this:
Share on Facebook0Tweet about this on TwitterGoogle+0
Advertisement ad1