Jowai: U Francisco Javier Rosado-May na Mexico, u wa man leh u expert ha ka Agro-ecology da wan li peit u ia ka chnong Moosakhia, yow ioh u yoo da ki khmat iong Oo hi yei rukom rep iong ki bru heini, yei pynemkam ki ya ki dawai sboh, dawai khniang, wa ya i rukom rep iongrim.

Advertisement ad1

Da batai u wa ka Agro-ecology toh ka saian hei wow sniawthooh ia i man iong i thaw, wa yei bor iong ka ha i rep, i riang. Yei stat, yei tip iong rim ki bru hei wow rep, wow riang da pynchong nongrim hei long, hei man iong ka mariang, wei wa ki wa boon hi ki nongrep da jooh mlien ki da kini ki rukom wei da sniawjooh bha ki ki. Kani pynman ko ia i rukom rep, rukom riang iong rim wow pynneh pynsah ia ka mariang.

Kamwa katni, ka imlang, ka sahlang, wa i ioh i kot, wa i kylla iong ka pyrthai hei rukom iong i suiñ bneiñ da wanrah ko ia ka Agro-ecology dei wa wailad ia ki nongrep kiwa thooh lad u pynheh, pynkmai yei jingmih, wa yei angnood iong ki u pynheh ia ki soh dei wa wanrah ko ya ka lad iarap hei wow pynneh, pynsah yei khyndaw chirup deilang wow iada ia ka mariang. Kamwa man katni ka Agro-ecology da kit khlieh ko yei thaw Iaw iong kitu ki nongrep dei wa ia kreh lang wa ki khlem da pynjulor ia ka imlang, ka sahlang iong ki.

U Francisco Javier Rosado-May katwa dang peit u ia ki jait khniang wa bam ia ki jhur

Hei wan jngieh iong Oo cha India, da chem u wa boon bha i tea i tip iongrim ki nongrep, tangwa ym em won u sñiawskem ki dei wa paka hei wow kdar luti chooh chooh ki yeini i rukom rep iongrim iong ki.Da ong haroh u wa emkam wow ia phyllu jingmut lang wa kini ki nongrep, iow iarap ia ki hei wow khroo ki heitea i tip tre iong ki. Wei da chem u wa waroh kini ki nongrep man ki kiwa smat hei wow ia e jingmut wei kamjooh leh wow tip chooh ki ia ki buit wa thymme.

Ha ka ri Mexico iong Oo, da man u kam u Founding President iong ka Maya Intercultural University ha Quintana Roo, ka ka thaw sikai ha kawa ki para tre-ri iong Oo da wan ki wow chah sikai wei wow purea yei tip iong iong rim chirup wa ka juk saian kawa katni. Heini i thaw da pyntbit ia ki bru wow sniawthooh paka bha ki ia ka rukom man ka mariang. Ini i rukom sikai da iarap i ia chiboon kiwa purae, wa man da em ki hei thaw rep, da wanrah ki deiwi tawan ki rukom pyrkhat  hei yatoh, wei rep, wei riang  dei wa yait ki ia i sñiawthooh bakla iong ki nongrep ki wom pu bien u pdiang ia ki buit wa thymme.

Da ong u leh ki nongrep ha Meghalaya emkam ki yei iarap, wa yei kyntu, kynpham iow e mynsiem ia ki katwa dang ia pyrchang ki u pynman ya ka jylla waroh kawi kawa pynmih ia ki jingthung paka, wei khlem dawai. Man sakhiat ko kawa eh, wei kawa chitom hei wow iehnoh chadien ya ki chemical fertilizers, pesticides, wa ia ki herbicides, neibhah  kiwa boon hi ki nongrep daw tieñ ki ia doohnong hei rukom rep iong ki lada dam u pynemkaam da ki. Hei jingsakhiat da ong u, wa lyngba i chem iong Oo, ini u man i dei kylla changphrah neibhah ki dawai hi pynsih ki yei khyndaw, ia ki jhoor, wei kamjooh leh ia i chait, i khiah ki bru. Lada pynemkam da ki sboh wa e ka mariang u wanrah ko yei miat i khyndaw wei u ioh leh yei ku ha i rukom pynmih ia ki jingthung. Ini i pynkylla hei rukom thung, rukom tep, u wanrah ko chiboon ki jingeh ia ki nongrep lada ym ioh won ki yei rukom iarap ia wa biang, wa tikna, wei u bampor ko hadooh 3-4 snem chwa wow kylla ko cha i kyndaw i wa paka waka nong wa boon.

I rukom ri ngap ha Moosakhia

Share this:
Share on Facebook0Tweet about this on TwitterGoogle+0
Advertisement ad1