Advertisement ad1

Jowai: Ynne ka sngi ha pchem ka ophis u Block Development Officer (BDO) Thadlaskein C & RD Block da em ka ialang paidbah kawa da khutlang ia waroh ki AEC wa ki VEC kani ka block. I thmu iong kani ka yalang toh u pynche paidbah ia ki Social Security Scheme kam ka Pradhan Mantri Jeevan Jyoti Bima Yojana (PMJJY), ka Pradhan Mantri Suraksha Bima Yojana (PMSBY) wa ka Atal Pension Yojana (APY).

Advertisement ad1

Ia ki rukom krehkaam kini ki skim da batai da u Manager ka Rural Bank. Da ong u wa ka Pradhan Mantri Jeevan Jyoti Bima Yojana (PMJJBY) toh ka skim ‘Life Insurance’ kawa dei wa su du 330 tyngka don hi chisnem, ye ki warap pateiñ u ioh 2 lak tyngka lada khlad i mynsien u bru. Kani ka skim toh ia waroh ki bru wa em 18-50 snem. Emkaam doh hi ki bru u em ka Bank Account yow ye u pynpsiah ha kani ka skim.

Ka Pradhan Mantri Suraksha Bima Yojana (PMSBY) kawa toh ka Life Inscurance skim kawa hap su 12 tyngka don hi chi snem. Hapoh kani ka skim ia ki wa iap mynsoo daw su 2 lak tyngka katwa ia ki wa tkoh na ki kjut nei hap i oor næ i mynsoo tynrah kari daw su chi lak tyngka.

Sa pynche paidbah sa kawi ka skim kawa pyrtuit Atal Pension Yojana (APY) ka skim bai bam tymmen kawa kiwon kiwon kiwa em nadooh ki snem 18-40 ye ki u ioh ia kani ka pension. Ye ki u jied ia ka pension kawa 1000, 2000, 3000, 4000 wa ka 5000 chi bnai. Ia kani ka pension ye ki u ioh hadien 20 lane hadien 42 snem chong ha i rta wa sdang ki bru u pynemkaam ia kani ka skim.

Ia ka skim Swachh Bharat Abhiyan won da klam da u K. Lyngdoh, Block Coordinator ka Thadlaskein Block. Ong u boon bha i ma wa mih na i rukom lai ait cha khloo heiwa ki phare wa ki mrad kam ki ksaw ye ki u rah i kjut cha ki khon ki kti iong ki bru deiwa kyndeh ke ki wa ki khon næ bi cha ki bam ki dih ki bru.

Da em i kyrpad naka kong C. Susngi, DRDA ia i emkaam u seiñ noh ia ki Social Audit Committee kiwa u kynthup ia uwi uwi u dkhot na ki VEC. Kani committee dei wa em ko ye ki u chem ia i pynemkaam hok ia ka poisa kam ha ka MGNREGS.

Kiwi tawan kiwa klam ha kani ka sngi da pynkynmoo ki ia ki paidbah wa toh u ye ki u yoo jngai ia ki skim wa paan ki naka sorkar. Ye ki mo ym ye u krehkaam ia ki skim wa paan ki ha ki chnong ki thaw ki, kamjooh leh to u paan ki da ki skim wa da em i tip i chemphang iong ki, kam ki nuksa lada bha i mih u saru cha chnong ki, toh u thooh ki ki skhim u pynbha pynmiat ia i wa da em chwa ki.

Da ioh lad ki paidbah leh ynne ka sngi u booh boon ki jingkylli ha khmat u BDO wa ki nong mihkhmat ki bank wa wan ynne ka sngi.

U chairman ka VEC Thadmusem da booh u ki jingkylli hei iatoh wa ym em u su maina chwa ia ki bai tiar chwa u chna kam ia ki luti lai kjat, i kerpood wa kiwi kiwi.

U BDO da ong u wa neidaw waka sorkar da pynkylla ko ia i rukom pyllait poisa katni ym ye de u pyllait poisa lada ym mih ka report hapoh ka website ka Meghalaya Integrated Information System (MIIS) wa ia ki kam da pyndep kam wa da mang.

Hei iatoh wa i sah ka poisa ka Axis Bank iong kiwa boon kiwa kreh 100 sngi, da khana ka area manager ka kong K. Mawthoh wa boon ki jingeh wa chem ki nadooh wym biang ki bank account number i wa em ha ki job card wa ki wa ioh ki na ka ophis u BDO te hap kyntait ia ki katwa ym pu ye u pynbiat pyntoh ia ki. Em ki por hei yatoh u pyllait ia ka poisa da ka kor chon kti, em ki chnong wa lai ki ym em network ki neitæ i daw ym ye ki u pynemkaam ia kini ki kor. Da khana ko wa ini da leh da kawa ong ki ka Direct Benefit Transfer (EBT), toh kawa dang pyrchang sien nyngkong ki hapoh ka jylla ha West Jaintia Hills.

Kiwa tawan ki paidbah wa klam da kyrpad ki ia u BDO u pyllait ia ki skim hei por wa biang. Ong ki wa lada ioh ki ka skim tih thlu um boon ki por ka ophis u BDO e work order ki manda poi ki por lyiur wa da joor u slap tæ ym ye u pynkreh ia ki. Da ong chooh chooh ki wa ka Block Thadlaskein man ko kawa heh tam na ki san tylli ki block wa em ha Jaintia Hills, kawa em hadooh 116 tylli ki chnong tangwa ka toh kawa ioh duna dooh ka poisa na waroh ki block.

Share this:
Share on Facebook0Tweet about this on TwitterGoogle+0
Advertisement ad1