Advertisement ad1

Jowai: Ka chlem sikai tynre kawa da tip kam ka Niamtre Committee iong ka dong Chilliang Raij ynnin ka sngi da dap ko le snem ha i e-sikai tynre ia ki khon ka Niamtre. Ia kani ka skur sikai niamtre da seiñ ia ka haka 23 tarik u Naichiphaw 2012. I thmu iong kani ka skur toh u pynwandur ha ki khynnah khian waki khynroo khyllood ia ki luti wa da seiñ da ki waheh wasian, u longchwa manchwa yow ioh ki i sniawthooh wa paka hei iatoh wa ka niam ka rukom. Ia kani ka e-sikai da pynman chisien chi taiaw ha ka sngi Bibar deiwa em ki waheh iong ka Seiñ Raij kam ki nongsikai ia ka rukom lehniam nadooh kammon u ngooh blai ha ki por wa chem jingeh ki ha ki jingim ki kamjooh leh ha ki por wa kongsan wa i rukom leh niam waphær waphær.

Ki khynnah da ioh sikai haroh ki na kani ka chlem sikai hei iatoh wa ka dustur riti ka jiadbru kawa iah luti ia ki ha ka jingim ki wa man ka sngi yow leit ki nei sih i roi khamtam ia ki khynroo khyllood iong kani ka dong. Yei por sdang ia kani ka skur sikai tynre toh 3:30 jenmiet haduh 5 waje jenmiet man ka sngi Bibar.

Advertisement ad1

Hei iatoh wa kani ka sngi lyngkhooh snem ka Khynroo Khyllood Chilliang Raij Niamtre Committee (KKCNC) u assistant Waheh Chnong iong ka dong u D. Pde da pdiang warom u ia waroh. Da e i Ngooh Blai da u acting Daloi iong ka elaka Jowai u P. Kynjing. Ia i rwai pdiang warom ia ki wa emlang da e da ki dkhot ka (KKCNC), i puræ ia ka kaiphod da ioh na ka Chairperson KKCNC ka kong C. Pde.

U Kongsan u O. R. Challam da ong u wa dei iah luti kani ka dong, kiwi tawan ki dong waphær waphær iong ka chnong Jowai da ialeh ki u bood ia ka nuksa iong kani ka dong deiwa wai ki ia ka Skur Sikai Niamtre kam ha ka dong loomiongkjam. Chooh chooh ban joor u wa yow leit ki khynroo khyllood u lai bakla, emkaam  u em kam kani ka sikai tynre kawa pynyoo luti ia ki khon ka Niamtre u ngooh blai ngooh syiem, yow tip ki ia ka dustur ka riti, ka kaam chongkha chongman, kaam Niam kaam rukom wa kiwi kiwi. U Symbood Kongsan u ma A. Sumer, Secretary Seiñ Raij Jowai da klam u hei iatoh u iatylli lang i kamni khnang ka jait bru iong i yow nangroi nangku ko na kawi cha kawi ka liang.

U P. Toi hei klam iong Oo da sneiñ da kyntu u ia ki khon khynroo khyllood iong kani ka dong heiwa kammon u ye ki u pynheh pynkmai yow maia para i yow leit na ki kaam wasih waroi deiwa em kani skur sikai niamtre. Da kyntu joor u wa toh u man ki khynnah wa tip kur tip kha tip bru tip blai lada em ki heiwon heiwon i thaw. Ym hoi u mylliñ ki ia ki kyntien snieñ ka bei u pa khnang yow man ki ki khynnah wow synchar yei hok. U L. Shylla da ong u wa ia iwon iwon i ka wow sdang i toh da sdang chwa i na iung khamtam yei bha khnang yow ye u leh u pynyoo ia ki kam ha khmat ka pyrthai dei wym em i artatien.

Da pachat ia ki kyntien sniawngooh da ka Secretary KKCNC ka Synchar Dkhar.

Ha kani ka sngi ki dong waphær waphær kiwa em hapoh ka chnong Jowai dawan pynchit pynsyaid ki deiwa wan rah ki ia ki chad ki rwai ki iong ki kam ka dak u burom ia kani ka sngi.

Share this:
Share on Facebook0Tweet about this on TwitterGoogle+0
Advertisement ad1