15 49.0138 8.38624 1 0 4000 1 https://wyrta.com 300 0
Advertisement ad1

Ka Nartiang Constituency toh kawa chah iehbeiñ hei roi i paar i puræ puthi i chait i khiah wa ki Bank: Dawan Lyngdoh

0 Comments
Advertisement ad1
Advertisement ad1

Jowai: U MDC yong ka Mynsngat Khanduli Constituency u Dawan Lyngdoh haka khubor wa phah u da ong u wa ka Nartiang Constituency toh kawi na kawa man pyrdi ki Constituency wei kawa sahdien tam hapoh ka jylla heiyatoh nadooh i roi i par, i puræ puthi, i rep i riang, i chait i khiah, ki thaw pyllang poisa (bank) wa kiwi kiwi.

“Ka puræ puthi toh kawa kordor tam haka juk katni tangwa lada wyrchaw ya kani ka thaw yong i ym yahap de wa kiwi ki thaw khamtam nadooh Mynsngat Khanduli wym em i ka thaw puræ wa biang katkam kani ka juk lait du ki skur ki bru samen, wei haka juk stad katni kini leh ym ye de ki u e yei sikai wa biang yaka thaaiñ, heiwa chem chiboon ki khynnah khynroo khyllood wym yoh laad ki u pyndep yei puræ khamtam hadien ka Selection Exam yong ki neidaw wa hap ki u mih na chnong yow lai thoh matrik chadooh Ummulong kawa jngai hadooh 40-50 Km na ki chnong yong ki. Ini i jngai pynman ya kiwa boon u sahkut i puræ chiteiñ nalor wa ban i dooh i duk,” ong u  Dawan.

Heiyatoh wei chait i khiah, ka thaaiñ Namdong Khanduli da chah ieh khonswet ko hadooh kattæ kattæ neibhah boon kiwa kjut wa toh u sumaar hapoh Namdong PHC hap ki wow lai chadooh Nartiang PHC, cha Jowai lane cha Shillong du neidaw wym em doctor khlieh sngi wei duna dawai, duna ki nurse hapoh ka PHC.

Da ong wa ka Namdong PHC kawa da toh u pynku kyrdan CHC (Upgrade) nadooh u snem 2012 wei ya ka Khanduli Sub-Centre cha ka PHC, tangwa sñiawsih u yoo hadooh uni u snem wym ye u leh iyi iyi hanla ki paid chong chnong kani ka thaaiñ maad ki chiboon i eh i khoo hei kjut chitom wym em wa yarap wow pynsuk yei eh i khoo ki paidbah.

I jngai yong ki chnong na kawi ka Sub-Centre cha kawi won wym yahap de katkam i boon bru (Population), boon ki thaw wa da em archah yei wa toh u em, kam ka Namdong Sub-Centre, kawa katkam ki kyndon yong ka Health Department i boon bru ha kawi ka Sub-Centre ymtoh u palat ya 3000 ngut tangwa kamwa man ha Namdong katni da em palat 7000 ngut kamjooh ka Sanaro Sub-Centre, Khanduli Sub-Centre wa kiwi kiwi ki Sub- Centre kiwa em ha kani ka PHC man ki katjooh. Ini pynman yaki wa chong chnong wow dooh mynkna chiboon ki mynsien wa kordor du neidaw wym biang ki thaw sumaar katkam wa toh u em.

Chooh chooh pynsñiaw u wa heiyatoh ka C&RD Block kawa da mut wai nadooh u snem 2014-15 ha ka chnong Namdong wei wot i thaw da dep e sñiawbha cha ka sorkar yow pynsuk ya ki bru ka thaaiñ tangwa hadooh kani ka por ym pu em man kaam ko hanla ki paidbah da toh u yoh ki.

“Hawa wyrchaw katkam i jngai wei i boonbru kani ka thaaiñ yong i da chong hok wow ioh ya ka C&RD Block ha Namdong neibhah du neidaw i jngai  ka C&RD Block ki paidbah boonsien dooh ki yei myntoi wa chong hok u yoh ki khamtam ki warep wa ki hap ki u pynlut por da ki sngi yow lai khamtam nadooh Lapangap Khanduli kiwa hap u lai  da ki 100 Km yow poi cha Block wa em ha Thadlaskein, ini i jngai wei boon bru ha kani ka C&RD Block pynsaja ko yaki paidbah nongkyndong ka thaaiñ heiyatoh i myntoi waphær waphær wa toh u yoh bynta ki,” pynrap u Dawan Lyngdoh.

Neitæ heiyatoh waka Bank, ka chnong Namdong kawa kynthup nadooh Mynsngat chadooh Sanaro da toh u em yaki Bank hapoh kani ka thaw khnang yow pynsuk ya ki paidbah neibynta i pyllang poisa  khamtam ha kani ka juk wa uwi pa uwi emkaam u em yaka Bank Passbook, tangwa kini waroh sahkut du hei yaklam wym poi cheiwon cheiwon.

Hajrong kini ki eh waroh, neiliang u Dawan Lyngdoh uwa da chah jied kam uwa mihkhmat pynsñiaw u i diaw wow yoo yei eh i khoo wa ki paidbah maad ki. Tangwa da iwi i sur khut u yaki paidbah wow yakrehlang chirup wei yooluti wa kini waroh u man kaam ki hapoh kini ki 5 snem. Pynkut ka kyrwoh na u Dawan Lyngdoh MDC 10 –Mynsngat – Khanduli Constituency.

Advertisement ad1

0 Comments

Leave a Reply