15 49.0138 8.38624 1 1 4000 1 http://wyrta.com 300

Ka NPP toh ka Team ‘B’ yong ka BJP: Congress
U Amit Shah toh u syiem i baam-tooh: Sushmita Dev

0 Comments

Shillong: Ka president yong ka All India Mahila Congress, ka Sushmita Dev da beiñ joor ko ya u MP ka Tura Parliamentary Constituency uwa man leh u National President ka NPP, u Conrad K Sangma deiwa ong wa ka NPP toh ka Team ‘B’ yong ka BJP wei da pynbaad ko wa ka NPP yarap ko ya ka party wa yoobeiñ ya ki khian paaid, ka Bharatiya Janata Party (BJP) wow yoh ko u psiah khlieh cha ka jylla Meghalaya.

Hawa klam wa kiwa pathai khubor ka Dev da ong ko “Lada u Conrad Sangma yaleh sakhiat u wow pynpsiah cha ka BJP ha Meghalaya, ym man ko kawa yahaap kam uwa mihkhmat na kani ka jylla,” deiwa pynrap leh, “Lada u Conrad Sangma man sakhiat u khon wa da kha ha Meghalaya toh u yakhun pyrchah u ya ki bor kiwa thmu wow tympiah tympra ya ka jylla”.

Da ong ko wa lada ki paidbah jied ki ya ka NPP heijooh hi i por da jied ko ya ka BJP neibhah wa ka NPP man ko ka Team ‘B’ yong ka BJP. Da kdaw ko yeiwa jia ha Manipur, hanla ka Congress da boon paaid ko, tangwa dei yarap ka NPP wa ka BJP katni da chna sorkar ki heitai.

“I emkaam i yei yada wow noh ya ki party kiwa man ki yong ka BJP kiwa thmu wow wanrah ya i piah i pra ha kani ka jylla wa ha ka thaiñ mihsngi,” da ong ka Dev.

Da pynbaad ko leh wa u president ka BJP, u Amit Shah wa man u u syiem ha i baam-tooh neibhah hapyrdi kini ki 4 snem duna wa ka BJP da synchaar ko ha Delhi i ku ka spah u Shah da ku i chadooh palat T. 16 hajar Klur wei uni u heh ym ye u wow jubab yeini hadooh katni.

Da pynbaad ko wa u Montri Rangbahdooh ka ri, u Narendra Modi ryngkat chirup wa ka RSS em ki i thmu wa ka Meghalaya wa ki jylla ka thaiñ mihgsngi u pynkai yabor ki ya ki paidbah ka thaiñ neibhah wa tieñ ki ya rem ka BJP cha ki thaiñ sepsngi ka ri.

Da syllaad ko leh ya u Modi heiwa da ong u heipor wa wan u cha ka jylla wa daw pynkylla u ya ka Meghalaya kam ka Model State, deiwa ong wa wot ya ka Gujarat ym pu man ko kam katæ ka Model State.

Chooh chooh da ong ko wa ka sorkar hapoh ka Congress ka Meghalaya da yoh ko ya ka u sarok Four Lane nadooh Guahati kawa da pynsuk ya ki paidbah ka jylla, wei da kyntu ko ya kiwa chong chnong ka jylla toh u pyrkhat yillu ki chwa wow e ya ka Vote cha ka ki Party.

Da yaroh ko ya ka jylla Meghalaya kawa pynkupbor ya ki kynthai deiwa kyntu ya ka Mahila Congress wow psiah ha man la ki thlu yung wow pynche yei rukom krehkaam ka Congress.

Da pynbaad ko wa ka RSS wa u Narendra Modi toh kiwa pyrchah ya i pynkupbor ya ki kynthai neibhah wa da kyntait wow e bhah (reserve) hadooh 33 Percent ya ki kynthai ha parliament.

Chah knieh ka Camera wa ka Phone ki ar ngut ki....

Previous

Beiñ ka UDP waka HSPDP ya ka NPP wa ka BJP hak....

Next

0 Comments

Leave a Reply