Advertisement ad1

Jowai: Kam chibynta u pynku yei kaam rep wei wow e mynsien ya ki nongrep yow chimkhia ki yei rep i riang kam ka lad kamai, yow wanrah yei yoh i kot ha yung ha sem kamjooh leh yow pynneh pynsah ya rymaw, ynne ka sngi ka ophis yong u District Horticulture Officer West Jaintia Hills District da pynman ko ya ka ‘Horticulture Exhibition’ namo ka pynyoo rong ya ki jhoor, ki soh, ki syntu wa mih napoh ka West Jaintia Hills District. Ya kani ka pynyoo rong da pynman ha madan Marain Hill Higher Secondary School Jowai.

Advertisement ad1

Ki nongrep ha kani ka sngi da wanrah ki ya ki mar rep yong ki kiwa boon jait ki wa da booh ha jar jar ki mar wa mih ha kini ki thaiñ ha ki kyrdan kam ki ‘Indigenous Fruits’ næ ki soh,  Indigenous Spice næ ki musla, Commercial Fruits næ ki soh, Commercial Vegetables næ ki jhoor wa kiwi kiwi. Ha ki jar jar ki kyrdan da pynman leh ya ka yakop yoh naam wa bha dooh wei da bichar leh da ki bru yong ka tnat Horticulture.

Da em leh i yakop ah syiñ da ki wa rep syiñ ka distrik heiwa da e ha ki 250 gm u syiñ wa 2 minit i por yow yoo hadooh katwon tylli ye ki u siah (slice) ye ki u ah.

Da wai ya kani ka  Exhibition da u MLA R. Syngkon Parliamentary Secretary yong ka tnat Horticulture deiwa emlang ki sahep wa pher wa pher na ka tnat Fisheries, Agriculture, KVK deilang wa ki nongrep.

U bah G. Dohling, Joint Director of Agriculture Meghalaya Shillong hei klam yong oo ong u wa ka kaam rep ha ki le tylli ki Exhibition wa da dep pynman ha Mairang, ha Khliehriat wa ha Jowai West Jaintia da chem u wa i rep dang ku i ha waroh i liang deiwa kreh lang ka sorkar wa ki nongrep lyngba kiwa boon ki skhim wapher wapher wa e ka sorkar.

Da ong chooh chooh u leh wa khuslai bha u ya kani ka Organic Mission næ ka rep khlem pynemkaam sboh wa da chna na ki dawai kam u Urea, Super Phosphate wa kiwi kiwa wa da myllien ki nongrep nadooh u snem 1958. Deiwa pynemkaam ya ki dawai kam ki sboh ong u wa da yoo wa ka rep leh da ku bha ko. Katwa ka Organic Mission kawa thmu u pynemkaam da ki sboh kam dei ait masi næ kiwa pynmih da ka rymaw ym ye ki u pynmih boon ki mar kamwa pynemkaam da ki dawai. Ong u man ko dooh nong bha ya kiwa rep. Da pynkynmoo u leh wa ha uni u snem em ki khniang wa baam ki boon ki jhoor wa thung ki wa rep tangwa oo ym ye u yarap ya ki neibhah wa da khang u pynemkaam ya ki dawai siat khniang.

Ong chooh chooh u wa i wanrah ya kani ka organic mission man ko iwa leh jhan ka sorkar khlem da pyrkhat bha kammon u pynkrehkaam ya ka. Da e nuksa u wa ka jylla Sikkim wa da yoh ko yei naam kam ka Organic State, da chem u wa man ko wa ymtoh ka wa sakhiat neibhah boon ki bru dang pynemkaam hi ki ya ki dawai yow yarap ya ki hei rep. Neibhah da chimpor hadooh 7 snem yow ye ki wa rep u pynkreh yei khyndaw man ka snem yow ye u wanrah yei rumkom rep ‘Organic Farming’. Kam ki nongrep 7 snem u dooh nong da man kawa ktah joor bha ya ki.

U bah D.M. Wahlang Additional Deputy Commissioner, Project Director DRDA, West Jaintia Hills Jowai da ong u wa hapoh ki 3 tylli ki Block ka West Jaintia man ko kawa eh bha u pyndep ya ka sylli bniah (survey) yow tip ki wa yi ki jait jhoor wow thung yow yoh myntoi ya ki wa rep han lada kattæ leh pynchlur u ya ki wa rep u sdang ki da ka ‘Multi Cropping’ neibhah boon ki lyngkha hadien wa dep ah kba sah chrah ki khlem wa rep ya ki. Ong u wa deiwa pyrchang ki u rep sa kiwi ki jhoor chwa u thung kba daw yarap bha ko ya ki. Da ong chooh chooh u leh oo kam uwa kreh sorkar kamjooh leh ya kiwi wa kreh sorkar man i kamram yong ki u lai yachem wa ki nongrep ymtoh u yang ya ki nongrep u wan ki cha ki ophis sorkar.

Nei liang u MLA u ma R. Syngkon da yaroh u ya ka tnat Horticulture wa ka da leh yo ya kani ka exhibition neibynta wow pynchlur ya ki wa rep wei da ban joor u wa emkaam ki sahep wa pait yei rep i riang u man ki kiwa toh lok bha wa kiwa rep wei wow yarap ya ki ha waroh i liang yow pynche ya ki wa emkaam ki u tip hei yatoh waka rep ka riang.

Kiwi tawan wa e klam ha kani ka sngi kynthup ki ya u bah S.K Riahtam, District Horticulture Officer WJH Jowai, bah Emiral Wahlang, Joint Managing Director MSFAC Meghalaya Shillong wa u ma M.J.Syngkon programme coordinator   K.Y.K Rymphum West Jaintia Hills.

Hajrong itæ ki pynyoo rong mar rep da wan chim bynta ha kani ka Exhibition da ka S.H.G. Iaraplang, ka Pynroilang Mukhap, ka Krishi Vigyan Kendra Jaintia Hills District Rymphum Jowai, Department of Agriculture Government of Meghalaya wa ka  Hortihub Thadlaskein.

 

U Soh Sama Bangblooh

Share this:
Share on Facebook0Tweet about this on TwitterGoogle+0
Advertisement ad1