Advertisement ad1

Jowai : Ka yakhun semifinal yong ka Super Division yong ka WJDSA da poi ko cha ka kynti yakhun psiah cha ka final næ ka Semi Final. Ynne ka yakhun da man ko ha pyrdi ka Moosyiem Shangpung SC wa ka Sabah Muswang SC da man ko kawa ya thaiñ bha nadooh wa sdang hadooh wa jan kut kani ka yaleh.

Advertisement ad1

Ha ka kylla step pyn ar team da pyrchang ki katwa ye wa nang yow pyntam kool kawi ya kawi khlem yoh laad ki da iwa biang wow pynkhih ya ka jar. Kamtæ ka yakhun ha ka kylla step da kut ko khlem em wa ye u thap kool.

Ha ka kylla miet leh da neh ki jar kool khlem khih hadooh wa yo kamwa ka yalehke daw poi ko cha ka yachut finalty. Tangwa ha ka minit wa 83 ki nongyaleh ka Sabah Muswang da khari da rah ki ya ka bol cha tre kool ka team pyrchah heiwa uwa yang kool ka Moosyeim Shangpung da ye u khang laad hadooh le sien le wat ya ki bol wa chut ki nongyalehke ka Sabah wow pynpsiah ka bol cha kool tangwa ha ka lad wa soo ka bol da yoh ko u psiah cha ka kool. Ya kani ka kool da chut da u Heipormi Shylla ka Sabah Muswang SC (ini waroh hapoh ka minit wa 83) hadien kani ka kool ym em de wa ye u thap hanlada ki nongyalehke ka Moosyiem Shangpung SC da pyrchang ki katwa ye u su kylliang ya kani ka kool tangwa i pyrchang yong ki da man i iwa sepai neibhah ka yalehke da poi noh ko chawa kut.

Na ini i jop ka Sabah Muswang da psiah ko cha ka yakhun final yong kani ka samoi yalehke.

Ka Semifinal wa ar daw yakhun mynstep ka 24 tarik ha pyrdi ka Khimusniang SC pyrchah ya ka Sohmynting SC heipor 1:30 pm.

Ya ka semifinal wa khaddooh daw yaleh ha pyrdi ka Moosyeim Changpung SC ka wa rem ynne ka sngi pyrchah ya ka team wa jop mynstep yow jied ya ka team wow yakhun final pyrchah ya ka Sabah Muswang.

Share this:
Share on Facebook0Tweet about this on TwitterGoogle+0
Advertisement ad1