Advertisement ad1

Jowai : Ka aiñ POCSO ha kini ki sngi da mih pyrtuid bha ko khamtam hei yatoh wa u Julius Dorphang uwa da chah pynngat ha kani ka aiñ hei yatoh wa chah kynnoh u wa slaitbor ya ka khynnah wa dang hapoh 18 snem.

Neiliang u Wyrta kwah i u pyntip cha phi ya ki kattu katni ki phang hei yatoh wa kani ka aiñ.

Advertisement ad1

Ka aiñ The Protection of Children from Sexual Offences Act, 2012 da pynkrehkaam ya ka nadooh ka 14 tarik u Khonchonglad (November 2012).

Hapoh kani ka aiñ da yada ya waroh ki khynnah chynrang wa kynthai wa em hapoh 18 snem cha poh nei chah lehbeiñ ki kam hei chah tba kti khlem akor, chah slaitbor wa kiwi de ki kaam wa yatoh wa i doh i pran yong ki.

Da pynmih ya kani ka aiñ neidaw wa em kamwa 40% kiwa em hapoh ka ri toh kiwa dang 18 snem chapoh wei i chah lehbeiñ ki dang joor na ki sngi cha ki sngi.

Ya ki kaam slaitbor da em ki kyndon yong ka hapoh ka Indian Penal Code (IPC) tangwa ym em pynphær ki ha pyrdi ki waheh wa ki khynnah.

Hapoh kani ka aiñ u pynchitom leh ya ki bru wa tip ya ki kaam chah lehbeiñ ki khynnah tangwa ym pyntip ki cha ki bor ka aiñ.

Ya kiwa emkti won u pynchitom ya ki da kiwa boon jait ki kaam kam kini ha wah:

Ya kiwa slaitbor wei wow choh u dat ya ki khynnah ym duna 7 snem u chah kset patok wei ye leh u kset patok ya ki waroh chi rta.

Lada leh ki kaam slaitbor da ki bru wa man kam ki, pulit, ki chipai, kiwa kreh sorkar kiwa toh i kaam yong ki wow yada ya ki khynnah u chah kset ym duna ya 10 snem wei ye leh u chah kset waroh chi rta.

Ya kiwa pynmuaid ya ki khynnah yow tba khlem akor ya ki ym duna ya 3 snem i chah kset ya ki wa ye u pynku hadooh 5 snem.

Ya ki mukotduma wa yaleh hapoh ka aiñ POCSO daw bichaar ya ki hapoh ki yung bichaar wa kyrpang deiwa pyrkhat ya i bha yong ki khynnah wei ya ki mukotduma toh u pyndep hapoh chi snem.

Ki pulit heipor wa chim ki ya ki sabut wa emkaam ki khamtam i rukom khana ki khynnah yei wa jia ye ki leh u leh yeini ha yung yong ki khynnah namo ha ki thaw wa jied ki khynnah. Yeini waroh lada ye toh u leh da ka pulit kynthai ka wym duna ya i kyrdan Sub-inspector wei toh u pyndep yeini waroh hapoh 30 sngi nadooh wa yoh yutip ki pulit.

Ym ye leh ki pulit u kset ya ki khynnah ha Police Station tang chi sngi leh wei toh u li booh ya ki cha ki thaw wa da booh kyrpang ya ki.

Hapoh kani ka aiñ kiwa chah kynnoh wa leh bakla ki haap yasait ki yow pynyoo wa ym em leh bakla ki.

Yei pynkrehkaam ya kani ka aiñ da pynkit ha ka National Commission for the Protection of Child Rights (NCPCR) wa ka State Commissions for the Protection of Child Rights (SCPCRs).

Ya ki pyrtuid yong ki khynnah da khang leh ya ki laad pynmih khubor wym hoi u pynmih ki.

Share this:
Share on Facebook0Tweet about this on TwitterGoogle+0
Advertisement ad1