Advertisement ad1

Jowai: Ki kaam chah thok poisa ki bru katwa dang lai ki sngi dang mih thymme ki hadien kiwa chah thok wa jop ki ya ka poisa da ki klur tyngka lyngba ki SMS, i chah sai poisa tooh na ki account yong ki bru heiwa ki bru da pyntip lut ki chaphang ki ATM yong ki cha kiwa phone wa kam kiwa kreh ha ki bank wa kiwi kiwi.

Ini wa da dep da jia sa iwi i chah thok poisa heiwa kawi ka bru napoh ri-loom Jaiñtia da yatoh lok ko wa uwi u bru wa kam wa oo toh uwa na Brazil wei da tipmit ko ya oo lyngba ka Facebook.

Advertisement ad1

Hadien wa da ya tipmit ki rap slem lyngba ka Facebook da poi leh chadooh i maya, uni u bru wa kam toh uwa na Brazil da kular u wow wan cha India yow yachem wa kani ka bru ha chnong wa sah ko.

Hadien ini, sdang ki buit wow thok poisa ya ki bru. Ki bru da yoh phone ki na ki bru wa kam wa ki toh kiwa kreh wa Immigration namo ha Custom ha Indira Gandhi National Airport wei uni u bru da chah ksoh ya oo neidaw wa ym em poisa India u kamjooh uni u bru wa chah ksoh ha Airport daw phah leh sa i dur wa oo da poi u ha ka Airport ha India wei cha ki wym tip ye u man kawon kawon ka Airport.

Ki bru kiwa chah thok daw chah paan poisa ki yow pyllait ya uni u bru wa chah ksoh lada ym kamtæ daw chah kem u neidaw wa ym biang u leh u ya ki kot ki sla kamjooh leh ka poisa India. Neiliang uwa chah kem won daw kular u wow su biang ya ka poisa hadien wa yoh u kylliang ya ka poisa ka ri yong oo kawa rah u chiboon bha. (Ha waroh ki Airport ye u kylliang poisa Dollar, EURO, Pound cha ka poisa India.)

Boon ki bru ha ini i por da ngait wei da thap poisa ki ha ki Bank Account wa kam toh yong ka Immigration namo ka Custom, nyngkong paan ki hapoh chi lak wei neitæ won daw pynmih ki sa kiwa boon ki daw wa uni u bru ym biang u ka VISA wa kiwi ki kot ki sla wei ka daiñ kuna ko ya oo kawa dang ku ko wei ki bru wa chah thok leh su ma su ki hadooh wa poi hadooh T. 2 Lak namo palat yeini.

Kiwa boon sñiawthooh ki leh wa da chah thok ki hadien wa uwa kam wa chah kem ym jubab de u ya ki message wei ki dur leh wa booh u cha Facebook leh toh kiwa chim hi-eh na kiwi, wei ki bru toh kiwa napoh India hi.

Sa iwi tawon wa sariem ya kam ini i jooh lyngba ka Facebook hi, hadien wa u chynrang namo ka kynthai da kam ki wa maya ki ya u namo ka bru wa em cha India da kular ki wa da dep phah cha India ya ki phone ki laptop wa syad wa kiwi kiwi ki tiar tangwa lada ym su ya ka bai Custom ym poi ki tiar cha India.

Kiwa chah thok won daw yoh phone ki na ki bru kam toh na ka Company Courier Service kiwa daw phah thap poisa da ki phaw hajar hadooh chi lak ha ki Bank Account yong ka Company Courier yow pyllait ya ki tiar yong ki tangwa ki tiar ym poi ki.

Kamni boon kiwa chah thok tangwa boon hi sarom ki u mih cha khmat hadien wa jia ya ki kamni wei ini da jia ya ki chynrang kamjooh ya ki kynthai.

U SP ka West Jaiñtia da kyntu u ya ki paidbah wa lada yoh ki kam ini ki phone wow pyntip cha ki pulit ha u No. u SP 9856040406, u OC ka Jowai Police Station 9856040410, DSP 9856040409, Addl. SP 9856040408.

Share this:
Share on Facebook0Tweet about this on TwitterGoogle+0
Advertisement ad1