Advertisement ad1

Jowai: Ka result ka Secondary School Leaving Certificate (SSLC) 2017 kawa pynbna ynne ka sngi da em 7 ngut ki khynnah na ki 4 tylli ki skur na ri-loom Jaiñtis wa kynthup ya ka North Liberty Higher Secondary School, Jowai, ka K.J.P. Synod Mihngi Higher Secondary School, Jowai, Lummuroo Secondary School, Shangpung wa na Nongtalang Govt. Secondary School, Nongtalang. Na kini, le ngut toh na North Liberty, ar ngut na KJP Higher Secondary wa mar uwi na Shanpung wa na Nongtalang da mih pyrtuid ki ha ka “First 20 Merit List”.

Hei kyrdan wa le da yoh u Da E Kynsai Mitre Pyrngap uwa puræ ha North Liberty Higher Secondary School uwa yoh marks 565 wei dayoh Distinction u ha ka English, Maths, Science & Technology, Social  Studies, Health Education waka Khasi. Ha ka Social Studies da yoh u 100 na ka 100.

Advertisement ad1

Hei kyrdan wa ynru da yoh u Arsamanki Thma na North Liberty Higher Secondary School uwa yoh 561 marks wei da yoh distinction u ha ka Maths, Science & Technology, Social Studies, Health Education waka Khasi wei ha ka Science & Technology da yoh u 100 na ka 100.

Ka Sakaniroi Tariang na K.J.P. Synod Mihngi Higher Secondary School, Jowai leh da yoh ko hei kyrdan wa ynru deiwa yoh ko 561 marks wa ki distinction ha ka Maths, Science & Technology, Social  Studies, Health Education waka Khasi. Ha ka Science & Technology da yoh ko 100 na ka 100.

Ha ka kyrdan wa khatsan da yoh ka Embhahlangki Thubru na ka North Liberty kawa yoh 552 marks wei da yoh distinction ko ha ka Maths, Science & Technology, Social Studies, Health Education waka Khasi.

Yei kyrdan wa khatynñiaw da yoh u Teishaphrang Suchiang na Lummuroo Secondary School, Shanpung uwa yoh 550 marks wei da yoh distinction u ha ka Maths, Science & Technology, Social Studies, Computer Science waka Khasi.

Hei kyrdan wa khatkhynde da yoh ka Buiriti Pohsnem na Nongtalang Govt. Secondary School, Nongtalang kawa yoh 548 marks wa ki Distinction ha ka ka English, Maths, Science & Technology, Social Studies, Health Education waka Khasi.

Ha kani ka jooh ka kyrdan da yoh leh sa u Erickson Lyngdoh na K.J.P. Synod Mihngi Higher Secondary School, Jowai uwa yoh 548 marks wei da yoh distinction u ha ka English, Maths, Science & Technology, Social Studies, Health Education waka Khasi.

Na kini ki ynñiaw ngut da yoh u yachem ya le ngut ynne ka sngi wa kynthup ya u Da E Kynsai Mitre Pyrngap, ka ka Embhahlangki Thubru waka Sakaniroi Tariang.

U Da E hei klam yong oo da ong u wa thmu u wow poi hi cha khmat kam hei kyrdan 7 namo iwa 8 ym em poi pyrkhat u wow poi cha dooh i kyrdan wa 3. Da ong u wa i pynkhreh u ya ka exam toh deiwa khrehkot 2 kynta chi sngi chwa ka exam wei da khreh u 5-6 kynta heipor exam. Da ong wa rap chem chitom u toh ha ka subject Social Studies tangwa kattæ leh da ye u wow yoh 100 hapoh 100 ha kani ka subject.

Heipor wym em khrehkot u sñiawsuk u wow yalehbol, yaleh chess kamjooh wow chimbynta ha ki yakop Quiz. U Da E toh u khon u Kamar Marshari waka Darisuk Pyrngap.

Ka Embhahlangki Thubru ong ko wa ka khrehkot ko 2 kynta chi sngi kam wow pynkhreh ya ka Exam wei neiliang u pa ko u Elwon Sungoh da pyntip u wa ka khon u toh kawa yoh nyngkong bait nadooh class 5 hadooh class 9 wei da yoh ko leh ya ka Scholarship man u snem. Oo kam u pa leh chimkhia u wow pynkhreh kot ka.

U Principal ka North Liberty da pyntip u wa waroh ki khynnah wa em ha ka “Top 20 List” daw ye ki u wan puræ dei mynkna ha ka kyrdan Higher Secondary yong ka skur wei kiwa yoh 90% cha neiñ won u haap su ki du chiteiñ dor donhi ki bai skur.

Ka Sakaniroi Tariang na K.J.P. Synod Mihngi Higher Secondary School toh ka khon u Wanphrang Challam waka Redish Tariang. Ka Sakani ong ko wa i thmu toh wow poi hi cha khmat wei da e ngooh ko ya u blai, kiwa ha yung hasem kiwa sikai kiwa yarap wow poi cha kani ka thong. Da ong ko wa heipor wa khrehkot emkaam wow sniawthooh yeiwa puræ bar yow pyllut por waræ u khreh kot khelm sniawthooh.

Ya ka skur Jaiñtia Higher Secondary School, Jowai da wanrah naam da u Dipon Nazary uwa yoh 100 na ka 100 ha ka Mathematics. Katwa ya ka St. Mary Mazzarello Girls’ Higher Secondary School, Jowai da wanrah burom da ka Happiness Dkhar kawa yoh 100 na ka 100 ha ka Computer Science.

Ha uni u snem ka West Jaiñtia Hills da em 3633 ngut kiwa yaleh ya kani ka exam heiwa da lait 2859 ngut iwa mut da poi 78.70 % iwa heh dooh na waroh ki district hapoh ka jylla.

Share this:
Share on Facebook0Tweet about this on TwitterGoogle+0
Advertisement ad1
Advertisement ad1