15 49.0138 8.38624 1 1 4000 1 http://wyrta.com 300 0

Kwah ka KSU wow pynbait ka NEHUSU wa kiwa pynlai ka NEHU ya ki kynrum kynram hapoh yung

0 Comments

Jowai: Ka Khasi Students’ Union (KSU), da pynsñiaw ko yei sñiawsih hajrong i chah leh embor ya kiwa yahkhmat ka NEHUSU ha ki bor pynlai yong ka NEHU Tura Campus ha ka 7 wa 8 tarik yong uni u bnai ha Tura. Kiwa yahkhmat ka seiñ hadien wa ki da dep yachem ki wa kiwa yahkhmat ka NEHUSU da yoh ki u sñiaw ya ki ujor kiwa ha rukom kiwa ymye u pdiang kiwa da poi chadooh u pood wa ktah ya i burom yong ki kynthai. Ka seiñ ka sñiaw ko wa man ko ka kamram yong ki bor wa pynlai ka NEHU Tura Campus wow pynbait pynbiang ya ka chong ka sah ya ki dkhot ka NEHUSU hawa ki wan ki wow pait ya kani ka Campus yow ya syllok neibynta ka bha ka miat yong waroh kiwa puræ ha kani ka skur bah.

Ka KSU ka beiñ joor ko ya u Pro VC ka NEHU Tura Campus uwa da leh ya ki kaam yoo beiñ ya kini kiwa yahkhmat ka NEHUSU deiwa kyntait wow yahcem wa ki wei da klam beiñ u ya ki iwa sñiaw ka seiñ toh iwa klam u chaphang ka jaitbru. Hajrong ini, ka seiñ ka maham ko ya waroh ki baar jylla kiwa em ha Meghalaya wa kynthup leh ya u Pro VC ka NEHU Tura Campus wa lada em sakhiat i klam beiñ ya ka jaitbru Khasi, ka seiñ ka ym chong kli kti ko wow pynhær ya kiwa nabaar ka jylla.

Advertisement ad1

Chooh chooh ka seiñ ka pynrem joor ko leh ya ki bru kiwa emkti wow klam ya ki ktieñ khlem akor ya ki dkhot kynthai ka NEHUSU wei da dawa na ki bor NEHU wa toh u pynchitom ya ki chi syndon. Ka KSU da beiñ ko leh ya i leh embor u Proctor uwa da maham ya kiwa yahkhmat ka NEHUSU wa emkti ki leh wow knieh yabor ya ki Identity Cards ki yong ki. Chooh Chooh ka seiñ ka pynrem ko ya i leh embor uni u Proctor wa ki toh u mih noh ki chiteiñ synyaw ki dkhot ka NEHUSU tangwa da kyntu u du ya ka President wa toh u sah ko samen ha University Guest House.

Ini i jia waroh pynyoo ki yei leh embor u Pro VC deilang wa ki paaid yong oo ya ki khynroo khyllood kiwa yahkhmat ka NEHUSU wei pynyoo wa uni u bru ym em u i kitkhlieh ya i bha ka miat kiwa lai puræ lane wow pynku ya ka NEHU tangwa du wow em kani ka skurbah neibynta wow myntoi i yong oo næ yong kiyi kiyi.

Khaddooh khatwai katkam wa tip ka seiñ da em ki ujor mar kylliang hapyrdi kiwa em neiliang u Pro VC ka Tura Campus wa kiwa yahkhmat ka NEHUSU kawa man i dai sarom ya kani ka skur bah kawa pawnam ka jylla. Kamtæ ka seiñ da kyntu ko ya ki bor wa pynlai ka NEHU Permanent Campus wa ki u sñiawbha ki wow tuklar lang ya kani ka thma pohyung khnang yow ye u pynbait hapoh yung wei wow poi noh cha ka sñiawthooh yumut. Ka seiñ da kyntu ko leh ya waroh ar liang mamla wei lada ye wow pynbait hapoh yung hapoh u pood u ang ka NEHU wei bha leh chiboon wow pyndam noh ya ki ujor wa da booh ha thanat. Hawa kut ka seiñ da ong ko em ko neiliang wei kyrchaan ko pura ya ka NEHUSU hajrong ini i jia wei man ko kawa smat hadooh u pood wow mih cha khmat wow tuklar ya kani ka kaam.

Ini toh katkam wa pyntip u Donald V Thabah, General Secretary ka Khasi Students’ Union.

Advertisement ad1
Advertisement ad1

0 Comments

Leave a Reply