Advertisement ad1

Jowai: Ha kini ki sngi wa katni; niar bha u chem ya ki chnong kiwa ym pu lait kari neibhah i daw wa kiwa yalam khmat wow yaleh yow yoh laitlooid ka ri kamjooh wa ka yakhih hill state movement toh yow wanrah yei roi i par hapoh ka jylla wa ka ri waroh ka wi.

Advertisement ad1

Tangwa hadien 68 snem i yoh laitlooid ka ri India wa i 45 snem i yoh ya ka jylla wa pura, ka chnong Samynnong kawa jngai du kamwa 15 KM na Jowai, man ko ka chnong kawa ym pu em surok hadooh katni leh. Kani ka chnong kawa em harood yong ka wah Myngot kawa em leh 46 tylli ki yung, da man ko ka chnong kawa chah ieihbeiñ ha ki bor sorkar khamtam ha yatoh wa ka luti ka syngkieñ.

Hawa ym em u surok uwa man kam u budloom yong ka roi ka par, ka roi ka par leh ka jngai ko naka chnong ong u ma Richa Bareh rangbah shnong. Ki nongchong chnong hap ki u lai kjat ym duna ya ka chi kynta chiteiñ yow poi ha ka surok kawa jan katæ toh ka surok Jowai-Moosakhia wei lada hap ki u lai hadooh ka surok Jowai Amlarem tæ ki hap ki u lai ym duna ya ka ar kynta yow yoh chim kari yow lai cha Jowai næ Amlarem.

Ini wa ym em surok da booh ko ya ka chnong hei eh wa joor bha neibhah ki bru hap ki u kit ki iwon iwon wa emkaam ki. Waroh ki tre chnong toh ki wa rep wei hap su bai kit T. 100/- nei bynta ki mar kiwa 30 ne 40 kilo tang yow pynpoi ya ki mar rep yong ki na chnong hadooh ha surok. Naka surok wa jan dooh wa ka chnong, ki hap su ki sa ka bai kari yow pynpoi ya ki mar rep yong ki cha ki yaw.

Ka kong Elbi Bareh ka tre chnong da khynna ko wa ha ki por chna yung chem chitom bha ki neibhah ki dor ki mar ki mata kam ki tin, ki nar, khyndaw bilat wa kiwi chongdor ki ar chah hadooh u pynpoi cha chnong neidaw wa ym em surok.

Ka kong Thilda Breh ka wa man kam ka nongsikai yong ka skur LP ha kani ka chnong da khana ko wa na ka liang ki nongpyllai skur leh ki em ki hei eh wa khroo bha neibhah hap ki u su archah wa kynthup sa i baikit ya u khoo baam ja sngi (midday meal) ki khynnah skur. Da ong ko leh wa neidaw wa i toh ki chnong wa dang khian chem chitom ki u pynmih poisa yow su yow pynpoi u khoo cha chnong yong ki.

Chooh choo da ong ko neidaw wa ym em Upper Primary School ha ka chnong, ki khynnah yong ki hap ki u pteiñ yei purea deiwa lai kjat ym duna ya ka ar kynta man ka sngi. Ha i por wa rang ka pyrthai ki khynnah ye hi ki lai kjat tangwa ha i por slap chem chitom bha ki hadooh wa hap ki u pep lai skur.

Hei yatoh wa ki skhim sorkar u ma Richa Bareh, Waheh Chnong ong u i bai lutsan man i archah i wa lut ki ha i su bai kit. Kani da kthah ya waroh ki yarap wa yoh ki na ka sorkar nadooh i chna skur, chna yung hall wa i kreh chispah sngi.

U Waheh Chnong da ong u leh wa ka chnong yong ki man ko kawa miat bha ka wa ye u riñ ya ki nong uiñsawari kamjooh leh ya ki wa ka-it u khwe dakha na ka wah umngot wa jan na ka chnong ki. Tangwa waroh ini ym ye u leh neidaw wa pu em surok wa lai cha chnong ki.

Iwa sniawsih dooh iwa chem ha kani ka chnong toh hei por yoh kjut ong u ma Jirab Langshiang wa ya ki wa kjut hap bah ya ki dei bah hadooh wa poi surok. Lada joor i chitom ki jooh chna ki da ka thaw pynthiah yow kit ya ki.

Ka chnong Samanong han lada man ko kawa cha eih beiñ man ko ka chnong wa khooid kawa em hajrong u loom wei ka wa pyngaad. Em ko leh ki krem wa suk u mih u psiah kamjooh ka wah Mynngot ha ini i thaw man ko ka wa biang bha u leh rafting ne u kin lein khian. Ini ki bynta ka umngot man i leh i wa dang boon dakha bha.

Share this:
Share on Facebook0Tweet about this on TwitterGoogle+0
Advertisement ad1