Advertisement ad1

Jowai: Ka tnat PWD da ioh poisa ko hei yatoh wow pynmiat ya u sarok NH-44 katkam ka skim kawa tip kam ka Improvement of Riding Quality Programme (IRQP) iwa mut u pynbha pynmiat yei lai i wan. Ia kani ka kreh ka PWD da e ko u kreh ha ka kompany M/S Dhar Constuction Company ha ka work order Job No.TA-044/MG/2014-15/123 ha i dor kreh Rs. 9,66,91,395(Khynde klur Yndru phawdru lak khyndephaw wi hajar le spah khyndephawsan tyngka) nadooh u moomer 41 hadooh moomer 53 man 12 kilomitar, itae toh nadooh Puriang hadooh Mukhla. Yei kreh dasdang ha u Nai Yndru uni u snem 2015. I rukom kreh toh u man i 50mm Bituminous Macadam wa 30mm Bituminous Concrete, wei manda dep da boohsap u neh 3 snem.

Ha ini i pynkreh yong kani ka M/S Dhar Constuction ya ini i bynta u NH-44 toh u siang ko da ka Bituminous Macadam iwa mut u siang sarok deiwa khlehlang wei khyndawbilat wa i rben u man 50mm dep neitae u ban na jrong da ka Bituminous Concrete iwa mut u siang psiang ha i rben 30mm.

Advertisement ad1

 

Ya i kreh dadep, ki paidbah leh ha ki kajiak sngi da hun da sniawsuk ki u lai u wan ki dribal ki  tre kari leh da yoo wa ka-it i khmat ki, neibhah hawa miat ki luti synkien smat poi thaw ki kari motor leh soi. Katkam ka work order ini i kreh toh u neh i 3 snem kat u yoo du ha poh 3 bnai la phrai nae wa sih da jaed da pra. Iwa ma chooh chooh toh wa i sih ini i bynta wa dang dep kreh toh da man i cha wa palat pood iwa ye u wanrah i ya tyhrah kari iwa yah cha i mynsoo mynsnam. Ha chwa u pynkreh ia uni u sarok ym em ware u sih kamwa man katni ki sngi. Neiliang ki paidbah da ood da khnium ki yeini kawa da poi cha ki tadong chkoor ki seiñ bhalang ka JYF wa ka FKJGP, kiwa neiliang yong ki leh da pynman ki u lai peit dei khmat wei da chem ki yei sakhiat wa u sarok da man sakhiat u uwa sih. Ha ini i lai peit kini ki seiñ da bood lang wa ki nongthoh khubor kiwa da chondur ya ki bynta wa jaed wa pra uni u sarok uwa dang dep siang psiang wot dang du chibnai ar bnai. Hawa peit yei jaed yei pra chynna wa i kreh toh iwa khaler wei i wym em u bood ya ki kyndon kat katkam ka work order neibhah da yoo i khleh toh da boon da u mooria jem ( moorum/shale nae sand stone) ymtoh da ki chips granite nae Chips Crete, neitae chooh chooh hawa peit da yoo la kam u sarok chyiap ymtoh de u sarok psiang. Neitae i long i man u sarok man iwa sih hadooh kattae kattae neibhah kiwa boon ki bynta wa sih uni u sarok da mih mooria chajrong wei boon phaw tylli ki thlu (pothole/crater), neitae em ki thaw kiwa kynroi mooria chajrong lada tne u sih bhah em wa pakhet u pynsuki nae pynsangeh ia ka kari da tikna ym ksoh brake da synchor beit ko chapharang kawa ye u poi chei yatynrah nae i hap i oor charood sarok.

Hawa kamni yi ma-ai u ong u jubab ka PWD yei kylli ki paidbah kiwa da booh jingkylli, wa ileh smat sih kamni ? I leh dang du chi bnai ar bnai wa dep kreh da jaed da pra phrai ? ym em wa peit wa yoo mo heipor wa kreh ? weileh ki staff ka PWD ym em li supervise ki mo yei kreh ? toh hi mo wa ye khai wa lehmon u kontrak ? lada yekhai u kontrak ileh ym pyneh ? ong chooh chooh ki paidbah yi krum ki PWD cheiwon ki SA (maharal) ? cheiwon ki JE (overseer)? cheiwon ki Asst. Engineer ? cheiwon u SDO ? cheiwon u Executive Engineer ? Ka poisa da dep su lut waroh maai?

Neiliang ki seiñ bhalang kamjooh ki nongthoh khubor da pyrchang ki u pan jingche na ki bor PWD tangwa ym ioh ki neibhah yaitdoh ki u jubab. Khatdooh u EE da jubab u deiwa phah pan jingche u na u secretary ka tnat PWD ka sorkar Meghalaya.

Share this:
Share on Facebook0Tweet about this on TwitterGoogle+0
Advertisement ad1