Advertisement ad1

Jowai: Ka Public Hearing wa da khut pynman da ki bor District ka West Jaiñtia ynne ka sngi hadien wa da em ka ujor hei yatoh wa i wym biang i pynkrehkaam ya ka MNREGS namo ka Scheme 100 sngi da ka VEC ka Ummulong da man ko kawa lai bait heiwa da wan chimbynta chongchit ki paidbah ka chnong hei sonteri leh ki pulit ka District.

Advertisement ad1

Ha kani ka Hearing u Rev. H.H. Mohrmen da man u kam u Chongknor, hei emlang u ADC ka District u D.M. Wallang, ka BDO ka Thadlaskeiñ C&RD Block, ki dkhot ka FKJGP-JH wa kiwi kiwi ki waheh.

Chwa wow sdang ka Hearing da em ka batai pynsñiawthooh yei daw wa pynman ya kani ka Hearing wei kammon i rukom u pyllai ya ka chaphrang wei da puræ leh ya ki mat wa chah pynbaad i wym biang i rukom pynkrehkaam ya kani ka Scheme da ka VEC ka chnong.

Ki mat wa da puræ kynthup ki nadooh i kaam wow kynroh yeiwa da tympra yei kynroh khnang wow chim thaw na kawi ka manbei wow chna sarok, i rukom su ya ka nongsngi ka wym biang heiwa em kiwa lai kreh leh tangwa ym biang i yoh nongsngi ki, i em Job Card boon tylli ha kawi ka manyung, i wym yoh ki u ksoh ya ki Job Card neibhah da ksoh bait da ki VEC, wa kiwi kiwi.

Hadien wa da puræ ya iwa chah pynbaad, da elaad ya u Chairman ka VEC uwa man leh u Waheh Chnong ka chnong u SS Langi wow yasaaid u yeini; da kam u wa neiliang yong oo ym em u yachem u ya kam kini ki bru hei yatoh wa i kynroh chram hadien wa pynheh ya u sarok, hei yatoh wa i wym biang i su ya ka nongsngi won da ong u ymtip u yeini neibhah wa yeini da leh da ka VEC wa kiwa kreh ka Block wei oo ym yohpor u wow pait ya ki Muster Roll Register, hei yatoh wa i yoh Job Card boon tylli ha kawi ka manyung da ong u wa daw pait ki ya ini waroh.

Da ong u leh wa boonsien ymtip ware u yeiwa jia neibhah oo boonkaam u wow lai thooh ya ki Scheme wei wow pait kreh katwa iwa boon hi i kaam da leh da ki Secretary weiwa ki kdaar hi-eh ki ya ki kot katwa oo won soi hi-eh u ki kam u Chairman yow ye ka Block wow su ya i lut i sep.

Da kyntu u leh ya ki paidbah wa ymhoi u baam ki ya ka poisa khlem kreh, neibhah ini man i pyrchah ya ka aiñ, wei da pyntip u leh wa da ujor u ha ki pulit pyrchah ya ki bru kiwa yoh poisa khlem kreh. Hei yatoh won wei wym yoh Job Card ki bru u ksoh da ong u wa kiwa boon hi phah ksoh ki ha ki VEC yeiwa ki paidbah da kyr’iaw ki wa pyrchah yeini (wa ym em u phah ksoh ki ha ki VEC).

Ya ini da elaad sa ya ki bru samen wow ujor ki wei wow khana ki yeiwa chem ki hei yatoh wa i pynkrehkaam ya kani ka Scheme, ka B. Rymbai da ong ko wa neliang u Secretary ka VEC, u Chwa Muksor da phah kreh ya ka wow pynlut yei kreh iwa T. 24,000 wei hadien ini da yoh won ko du T. 9,000 donhi nalor wa da e ko i lut i sep cha u Secretary yeiwa oo da kam u wa ym kynmoo u wa em ki kot wa e ko cha oo.

Ka I. Challam da ong ko wa da pyntip wa poi ka poisa T. 7 hajar tam ha ka Account yong ka wei hadien wa sai ko ya kani ka poisa da e ko chibhah cha ka Sordar ka VEC wa tip kam ka Mary Shangpung.

Ka Rosida Pasleiñ da ong ko wa da kreh ko 28 sngi wei da poi ka poisa hadooh T. 24,500 wei na kani ka poisa T. 4,500 da yoh ko katwa kawa tam won kawa T. 20,000 da e cha ka Sordar wa tip kam ka Edris Lyngdoh. Hei yatoh wa ini ka Lyngdoh da ong ko wa da em chwa i sñiawthooh yumut hi waroh neibhah wym em chynrang kiwa bien u kreh.

Ka Bida Phawa da kam ko wa nadooh wa sdang ko u kreh na kani ka Scheme da dooh bait ko 4 namo 5 sngi ha ka chi snem.

Neiliang u Dro Passah uwa kreh kam u mistri deiwa rah ya ka Passbook u da pynyoo u wa psiah ka poisa hadooh T. 35 hajar tam heiwa kamwa 30 hajar tam da e cha u Chwa Muksor ya iwa da silet u katni.

Ki kattu katni ki khynroo leh da yieñ klam ki ha kani ka Hearing heiwa da rah ki ya ki dur wow kylli yeiwa pynkrehkaam ya ki scheme wei da em leh wa kylli wa kammon wa hapoh kawi ka chnong em hadooh le tylli ki VEC.

Da em leh boon tylli kam kini ki ujor pyrchah ya ka VEC, wa ya u Waheh Chnong u SS Langi heiwa da kam wa nadooh wa mih pyrthai ini waroh da mih ki khubor wa lak phaw jait kam i em Job Card uwa kreh Sorkar, ki chithi maham u Waheh Chnong, i e Residential Certificate i wym sñiaw yahaap wa kiwi kiwi.

Hadien kini waroh da elaad biang ya u Chairman wa u Secretary u pynche ki ya ini i chah pynbaad ki waroh, yeiwa da yaleh ki u yasaaid yeijooh.

Khaddooh hawa elaad ya u SS Langi u klam ha kani ka Hearing heiwa da pdiang u yei duna i rukom krehkaam ka VEC deiwa ong, “Hanpaya boon i duna hei rukom kreh ki Secretary wa ki VEC wei yoosar leh em iyi iyi cha lyndet wa mih ini awri.”

Ha chwa wow kut neiliang u DM Wallang uwa da puræ u ya ka rai kawa da chim ynne ka sngi heiwa da pyntip u wa ha kani ka 9 tarik uni u bnai daw pynman ya ka Job Card Re-verification (u pynsakhiat biang ya ki Job Card), da e por ya ka VEC wow pynbait yeiwa emkaam hapoh 7 sngi chwa wa ka sorkar u leh ko iwon iwon iwa emkaam.

Share this:
Share on Facebook0Tweet about this on TwitterGoogle+0
Advertisement ad1