Advertisement ad1

Shillong: Ka seiñ kieñ suloi be-aiñ ka Hynñiewtrep National Liberation Council (HNLC) da kam ko wa u Montri Rangbah ka jylla, u Dr. Mukul Sangma da phah wyrta u cha ka seiñ wa lada kwah ko wow yaklam yasuk toh u kyrchaan ko ya ka seiñ Congress ha kani ka election MLA wow wan.

Ha ka khubor wa da pyllait ynne ka sngi u Publicity Secretary ka HNLC, u Sainkupar Nongtraw da kam u wa u Dr. Mukul Sangma ha kani ka tayaw wa da dep da phah ksiang u cha ka seiñ wa toh u kyrchaan ko ya ka Congress ha kani ka election wow wan wei lada kwah ko wow yaklam yasuk waka.

Advertisement ad1

Da ong u wa hei sakhiat ka seiñ da phah chithi ko cha ka sorkar India wow thung da u ksiang wow yaklam waka seiñ tangwa katni u Dr. Mukul da kwah u wow thooh laad wow yoh myntoi u ha ka election.

“Da khana ya i wa lada kwah i u yaklam yasuk, toh u kyrchaan i ya ka Congress ha ka election wow wan khnang wow elaad biang ya u Dr. Mukul wow man kam u Montri Rangbah ka jylla” da ong ka HNLC.

Tangwa neiliang ka HNLC kwah ko wow pynbna wa ka ymtoh kawa biej ka wow chah pynbiiej hi-eh ha u Dr. Mukul Sangma neibynta ka buit saiñ pyrthai yong oo kamwa da leh u ha ri-loom Garo ha ka election wa dadep, da ong u Nongtraw.

Da ong u wa ka seiñ kwah ko u pynche wa neini chakhmat uwon uwon u ksiang wa phah ka sorkar pyrdi toh u man u uwa laitlooid wei uwa lait nei chah pynchaad ha ki seiñ saiñ hima.

“U Dr. Mukul ymtoh uwa ksoh rta ya ka Meghalaya wei man u du kam u Montri Rangbah ha i por wa da booh wei ym slem de da dooh hi u ya kani ka chuki” da ong ka HNLC, kawa da pynrap deiwa ong wa oo man u u bru wa sarong, wei man u du kam uwa mihkhmat ka Ampati wei ym jooh pyrkhat u neibynta ki paaid Khasi Jaiñtia lait noh du ya ka Garo Hills.

U Nongtraw da ong u wa ka seiñ ym kyrchaan ko ya kawon kawon ka seiñ saiñ hima lait noh yaka ka seiñ ka wow kreh neibynta ki paidbah ka jylla hi waroh kawi.

Nachwa ka seiñ yooluti ko wa man sakhiat u kam uwa yahkhmat wa khroo ka jylla tangwa i kwah myntoi samen u da pynman ko wow dooh u yei chaniah ki paidbah.

Ka HNLC da maham ko leh ya kiwon kiwon kiwa pynemkaam bakla yei pyrtuid ka seiñ heipor election kamwa da phah u Dr. Mukul Sangma.

Share this:
Share on Facebook0Tweet about this on TwitterGoogle+0
Advertisement ad1