15 49.0138 8.38624 1 1 4000 1 http://wyrta.com 300 0

Phah takit ka MHRC yei leh embor ki pulit ya ki ar ngut ki bru hapoh ka jylla

0 Comments
Advertisement ad1

Jowai: Ka Meghalaya Human Rights Commission (MHRC) da chong bichaar ko ya ki ar tylli ki ujor heiyatoh wa leh embor ki pulit ya ki bru paidbah hapoh ka jylla.

Ha i jia wa nyngkong toh iwa jia ya u Mancheng D Marak haka 07-12-18 heipor 11:30 i miet heipor wa dang chong u hapoh ka Auto Rickshaw yong oo ha pchem yung u heiwa ki 6 ngut ki pulit wa kynthup ya u Babul Roy da wanrah ki da ka Torch Light wa khlan bor bha heipor wa dang klam phone u wei da pynche ki ka ha ki khmat u.

Ki pulit da psiah yabor ki cha pchem yung u Mancheng wei da kylli pyrtuid ki oo wei da sdang ki wow dat wow choh da ki lathi wei manda kylli u phi ki yi da jubab ki ya oo wa toh u burom u ya ki neidaw wa ki toh ki pulit.

U Mancheng da khana u ya ki wa oo toh uwa kreh hapoh ka Excise Department wei dang joor i chah dat u heiwa da sñiaw ya ini da ka Silginchi D. Marak kawa yaklam phone wa u Mancheng wei da sñiaw ko leh ya ki ktien wa sih wa sang.

Neiliang ki pulit yow murieh ya ini da pynbaad ki wa oo toh uwa dai kiad tooh heiwa u Mancheng da phah u ya ki wow khynra yei yung yong oo tangwa ki pulit ym ap ki yeini wei pteiñ ki wow dat oo.

Hadien ini ki pulit da rah ki ya oo cha thanat wei da pynbor ki ya oo wow soi ya ka kot wa em ki jait kiad wa yoh kem ki na oo.

Da kit leh ya oo cha Tura Civil Hospital heiwa ki Doctor ym bna ki u sumaar oo wei da boonkaam wow pyndep chwa ya ki kot ki sla hadooh wa u Mancheng da hap lai u cha Holy Cross Hospital, Tura yow yoh yei sumaar.

U Mancheng da ujor FIR u leh ha u OC ka Tura Police Station pyrchah ya ki pulit wa pynmynsoo oo.

Neiliang ka MHRC da phah Notice ko cha u Director General of Police (DGP), Meghalaya yow pynman ya ka takit da u sahep pulit uwa ym duna ya ka kyrdan Deputy Inspector General of Police (DIGP) wei u pyndep ya ka takit hapoh 30 sngi.

Ha iwi tawon i jia haka 19-12-18, u Manovan Massar da pynbaad u wa u Bashan J Laloo, uwa jooh man kam u Deputy Superintendent of Police, East Khasi da dat pynmynsoo u oo.

Neiliang u Manovan da ong u wa heipor wa yah u ya ka kari Maruti Car 800 wa em ya u number AS 01 E 6188 da chim pass u ya ki kattu katni ki kari ha sarok wa em ka St. Edmund’s College wei manda poi u ha Fire Brigade deilang wa u lok u u Dharmesh Parman uwa na Mumbai da chah pyn sangeh ki ha uwi u pulit uwa da paan ya ka License yong oo wei uni u pulit da em pyrtuid u kam u Laloo ha ka riam pulit u wei da phah mih u oo napoh kari u wei da dat da choh u oo wei da klam u ya oo hei ktien Hindi wei u Laloo da ong u leh wa “Lada ini toh cha ri-loom Garo da siat O me.”

Hadien ini da kit ya u Manovan wa u lok u cha Laitumkhrah Traffic Police wei u Manovan da kam u wa ym em sñiaw chait u neidaw wa chah dat u wei da lai u cha paikhana yow prai.

Hadien wa wan u na paikhana u Laloo da sdang u wow tyrooh ya u Manovan da u lathi wei da mai u leh ya ki pulit wa chah ya oo wow chong u. U Laloo da yah u oo cha kawi ka kamra wei da phah chong u ya u Manovan ha khyndaw wei u Laloo da thang sikret wei da pynbaad u wa u Manovan da muaid kiad u wei man u leh uwa pynemkaam drugs wei da mih noh u Laloo na kani ka kamra.

Ki pulit da kit ki ya u Manovan cha Civil Hospital Shillong wei da pynman ya ka sylli wei ym em chem ki wa dih kiad wei dih drugs u.

Kamtæ ka MHRC da phah ko ya ka Notice cha u Director General of Police, Meghalaya yow pynman ya ka takit da u heh pulit wa em ya ka kyrdan wym duna ya u Deputy Inspector General of Police (DIGP) wei wow pyndep ya ka takit hapoh 30 sngi wei wow pyntip leh cha kiwa ujor.

Ini toh katkam wa pyntip u PJP Hanaman u dkhot ka MHRC.

Advertisement ad1

0 Comments

Leave a Reply