15 49.0138 8.38624 1 1 4000 1 http://wyrta.com 300

Phooh ka lehwarom dap 50 snem ka Rymbai Pohshnong Government LP School

0 Comments
Advertisement ad1

Jowai: Ka Rymbai Pohshnong Government LP School hei lai luti yong ka da maad ko ya iwa boon i eh i chitom wow e ya i stat cha ki khynnah tangwa handlada kattæ leh ynnin ka 28 tarik da yoh ki wow lehmen yei dap 50 snem namo ka Golden Jubilee yong ka skur kawa da seiñ nadooh u snem 1968 da ki kattu katni ngut ki bru waheh wasian kiwa pyrkhat jngai ya ka puræ puthi.

Da wan wai pyrda ya kani ka lehkmen da u montri uwa pait yaka tnat puræ puthi ka sorkar jylla u Lahkmen Rymbui hei emlang u montri ka tnat Revenue & Disaster Management u Kyrmen Shylla wa da wan sakhi da ki spah ngut ki kiwa chong chnong, ki khynnah skur, kiwa sikai na ki skur waphær waphær yong kani ka chnong.

Advertisement ad1
Advertisement ad1

U Lahkmen Rymbui hei klam yong oo da ong u wa ye ka Rymbai Pohshnong Government LP School wow pyndep ya 50 tylli ki snem ymtoh ka lai luti kawa ke tangwa man ko kawa jrong, “Nga ym tharai O wow em kawi leh ka paar mooyong kawa da ye u lai luti da 50 tylli ki snem wow ye u pynyoh myntoi ya ki paidbah ka thaaiñ” da ong u leh wa kani ka skur da man ko ka paar wa ka shlem kawa da pynmih ya chiboon ki bru wa khroo wa kawa dang pynmih khlem sngad de.

“Ka kaam puræ puthi hapoh ka jylla man ko kam ka sarok kawa dap du ki thlu lada kyruiñ cha kiwa sikai wa ki yung skur sorkar da yoo wyrai u pait teiñ teiñ tang ka tin ym em,” ong u Rymbui.

Kamtæ da yooluti u wa deiwa em ka Education Policy kawa da mang kyrpang wow pynkylladur wei wow pynpliah ya ka puræ puthi hapoh ka jylla waroh ini daw kylla i.

Chooh chooh da pyntip u wa ha uni u snem da mang kamwa 150 tylli ki skur ki wow yoh myntoi heiwa kamwa T. 8,25,000 daw e yow pynchna pynbha wei wow chna kamra chong Class wei ka Rymbai Pohshnong Government LP School da man ko kam kawi na kini ki skur wow yohmyntoi na kani ka Scheme sorkar.

Katkam wa khana parom chaphang kani ka skur da ka Halleluia Dkhar, Secretary SMC, da ong wa ha u snem 1969 da chim kti ya ka skur da ka sorkar yow man ko kam ka Government School wei da thung yaka (L) Monis Ksih kam kawa sikai skur wa nyngkong ka skur wei ha u snem 1971 won da thung Head Teacher wa nyngkong ya u (L) Phrang Rymbai wei ha uni u jooh snem da yoh laad wow phah ya le ngut ki khynnah wow yaleh yaka Lower Examination ha ka kyrdan Class III cha Jowai.

Ha u snem 1983 ka skur da chah tympra ko ha i bor ka rymaw wei nadooh ini i por ki khynnah skur wa kiwa sikai ki da chem chitom ki wa ym em kamra chong Class wei ha u snem 2011 ka SMC da paan yarap ko na ka dong wei ka dong da e ko 5 tylli ki kamra.

Ka Rymbai Pohshnong Government LP School em ko 5 ngut kiwa sikai, 3 ngut ki cook, wei ki khynnah wa em hapoh ka skur em ki 152 ngut.

Ha kani ka sngi da yoh leh yei klam na u MLA ka thaaiñ u Kyrmen Shylla, ka MDC ka thaaiñ ka Violet Lyngdoh, u Justine Lyngdoh Waheh Chnong Rymbai, u Principal ka JEC u Phervision Nongtdu wa kiwi kiwi wei da pynlai ya ka yalang da u Rev. SB Lyngdoh.

Da pynphooh pynphieñ ya kani ka lehkmen deiwa chimbynta ki 6 tylli ki skur ha ka March Pass, ki rwai wa ki yaleh Drill.

Advertisement ad1
Advertisement ad1
Advertisement ad1
Advertisement ad1

Da ki thaw pynyieñ kari wa boon mala u chna ka....

Previous

E yarap sñiawbha u AL Hek chi bnai na ka tulop....

Next

0 Comments

Leave a Reply