Advertisement ad1

Jowai: Ka ialehke Table Tennis kawa nyngkong hapoh ka distrik West Jaintia Hills kawa tip kaam ka 1st District Open Table Tennis Championship kawa pynman daka West Jaintia District Table Tennis Association (WJDTTA) Jowai, da poi ko cha wakut ynnin ka 3 tarik.

Da sdang ia kani ka ialehke Table Tennis nadooh ka 2 tarik uni u bnai ha Khimmusniang Indoor Hall Jowai. Ia ka pynhiar pyrda ia kani ka ialehke ha ka 3 tarik da wan sakhi lang da u Stephanson Mukhim Parliamentary Secretary uwa peit iaka Sports & Youth Affairs iong ka sorkar jylla.

Advertisement ad1

“Kani ka ialehke toh kawa dang pynkhai im biang ha kini khajak bnai wa da lai hadien da palat 10 snem iwa da wiar ko na chnong Jowai. I pynim iaka man i kaam u wailad wailuti iaki khynnah wa ki khynroo kiwa em i sap iow nang ku ki chaphrang kamjooh leh hadien wa da yo wa boon hi ki ialehke nadooh ka Badminton, Kick Boxing, Kriket wa kiwi lai bha ki chakhmat katwa iaka Table Tennis won da booh cha kdong khlem da kynmoo chooh” ong ka kong Emlut E. Laloo Adviser ka WJDTTA ha i klam lamkhmat iong ka.

Kamtæ ha ka 23 tarik u May u President ka WJDTTA u ma P.R. Bareh wa ka kong Emlut E. Laloo  da khut ki ia ka ialang wa nyngkong da i jingmut u pynkhai im biang ia kani ka ialehkai Table Tennis hapoh ka district. Ha kani ka iachem nyngkong da wan sakhi leh da ki dkhot ka Meghalaya Table Tennis Association Shillong kawa ksoh President da u R. G. Lyngdoh.

U ma Stephanson ha i klam iong Oo da iaroh u ia i kreh chitom ka Association hawa da ye ki u tan ia kiwa boon ki nongchim bynta han lada kani toh ka sien nyngkong leh, boon na ki chynna wa em ki i sap ialeh Table Tennis. Kamtæ da pyneh nasib pyneh daw u ia ka Association iow ye chooh ko u leh ki kaam wa kham bha chooh neini cha khmat.

Hawa peit cha ka ialehke, ki nongialehkai da wan chim bynta ki haki kyrdan wapher wapher kam ka under-15 Boys, Senior Men’s Double wa ka Senior Men’s Single.

Ka iakhun phainal iong ka under-15 Boys u Clifford Lakiang da pynrem u ia u Eraphael Dkhar, haka  Senior Men’s Double, u Asuklin Shylla wa u Rimilan Passah da pynrem ki ia u Darilangki Passah wa u Rabin Passah katwa ha ka Senior Men’s Single u Jeffrey Liiting da pynrem u ia u Aldrin Wahlang.

Ia ki khusnam cha ki wa jop da sam da u ma Stephanson Mukhim, u ma Khrobok Passah, SDO ka East Jaintia wa u Secretary ka WJDTTA u ma D. Nartiang wa kiwi.

Da sam leh ia ka khusnam cha u nongialehkai wa chkeh tam ha kani ka ialehkai u Raphael Dkhar.

Kini kiwa jop ha kani ka 1st District Open Table Tennis Championship daw lai mihkhmat ki iaka district cha ka kyrdan ialehke iong ka jylla kawa daw man haka taiaw khatdooh uni u bnai ha ka 27,28 wa 29 tarik.

Share this:
Share on Facebook0Tweet about this on TwitterGoogle+0
Advertisement ad1