15 49.0138 8.38624 1 0 4000 1 https://wyrta.com 300 0
Advertisement ad1

Pyllait im u payu wa dang 7 snem ya u diah na i yung wa kop diñ

0 Comments

Shillong: I chlur yong uwi u dong khian wa dang 7 snem i rta da pynman ya oo wow ye u pyllait im ya u diah u uwa dang chisnem ar bnai na i chah thang ha ki thylliej diñ, ha ka janmiet yong ka 5 tarik uni u bnai, heiwa ka yung wa sah ki da kem diñ ko syndet katwa u diah u dang thiah u hapoh yung.

Ini i jia toh ha ka chnong Umjathang kawa haap hapoh ka Mawlai C&RD Block, wei katai ka yung toh ka yong ka Promise Marwein kawa man ka beipun kini ki khynnah.

Uwa pyllait im da tip pyrtuid kam u Nangshaiphrang Marwein, 7 snem i rta, uwa man u khon wa ar yong ka Kingnanti Marwein wa u Balashai Sawkmie wei u Nangshaiphrang toh uwa dang puræ Class KG ha Umjathang LP&UP School.

Hawa yoh u yaklam kajiak wa uni u khynnah, da pyntip u wa ha katai ka sngi, katwa dang wan u cha yung da chem u wa da kop diñ i yung wei u diah u uwa dang chisnem ar bnai dang em u hapoh yung, wei deiwa chlur u khlem da pyrkhat iyi wow jia ya oo lada psiah u chapoh i yung da sai u ya u diah u.

Da pyntip u wa ha i tai i por i diñ da kyr-ooh bha i heipor wa psiah u chapoh yung, tangwa da ye u wow pyllait im wei wow rah ya u diah u cha lait khlem i mynsoo ki pyn arngut lait da i kopdiñ ka sulapoh malu mala wa sap u.

Da pyntip chooh chooh u wa hadien wa da dep sai u ya u diah cha lait, da booh u ya oo ha madan wa rap jngai na yung wa kop diñ wei da lai pyntip u cha ka beiheh kawa sah hajan neidaw wa ka beipun waka bei yong ki dang em ki cha loom.

0 Comments

Leave a Reply