Advertisement ad1

Shillong: Ki dkhot ka liangpyrchah ha KHADC wa kynthup na ka UDP, HSPDP, wa ka Congress da pynbaad ki wa u CEM ka KHADC u Pynshngain N Syiem wa man u kam uwa synchaar embor u wym yaphær de na u Montri Rangbah ka jylla u Dr. Mukul Sangma.

Ini i beiñ ka liang pyrchah ya ka Executive Committee khamtam ya u CEM toh hajrong i rukom bhah ya ka poisa ka T.133 klur neibynta ki MDC kawa da yoh na ka sorkar pyrdi neibhah wa man ko kawa noh chilliang hanlada u CEM da kam u wa da bhah ya ka salonsar, tangwa ini waroh ym man i iwa sakhiat.

Advertisement ad1

Ya kani ka phang yania lyngba ka Zero Hour Notice da wanrah da u MDC ka Sohra, u Donevan Kharwanlang hadien wa mih ha ki laad pathai khubor wa yoh boon ka Nongpoh wei duna ka Laban ha i e bhah u CEM ya ka Special Assistance Scheme (SAS).

Hawa yania u MDC ka UDP na Umsning u Donkupar Sumer da kynthah u wa ka T. 133 klur man ko kam u Magnet wa riñ ya ki MDC wei wow pynthkoh ya ki kaam kpynroi ka KHADC.

U Donkupar da ong u wa hadooh u MDC ka UDP u Equator L Nongrang leh uwa da wiar na ka Dorbar waroh chi sngi da chah patah u ha uni u jooh u Magnet wa ka poisa kani ka party.

Da ong u leh wa katkam wa kheiñ lada yabhah mar T. 3 klur uwi u MDC u man ko waroh T. 87 klur tangwa na kani da em wa yoh du T. 3 klur, em won kiwa yoh T. 1 klur weiwa em kiwa yoh duna.

Da won u wa katkam ka yutip wa yoh nalor ka poisa wa da mang cha ki MDC, da em kiwa pynlut ha i chna wa emkaam ko Council tangwa ka poisa kawa sah nalor kini waroh, toh u em ko sa T. 16 klur katwa kwah won u tip wa kani ka poisa kawa palat T. 16 Klur da pynlut ya ka cheiwon.

Da ong wa lada ka EC ym ye ko u pynche da ka rukom kheiñ wa biang wei i kitkhlieh toh u e ko ya i jubab ya ki paidbah.

Katwa u MDC ka HSPDP na Sohiong u Samlin Malngiang da ong u wa u CEM ka KHADC da pynbaad u wa u Dr. Mukul Sangma da leh embor u ha KHADC khamtam hei yatoh waka SAS wa T. 133 Klur wa e cha ki MDC.

Da ong wa ka Constituency yong oo da yoh ko T. 1.96 Klur wei na kani T. 42 Lak toh wow e Work Order u CEM wa khlem pyntip u cha u MDC ka thaiñ.

Hei jooh i por, u MDC ka Sohiong da ong u wa u CEM da kylla ktien yeiwa kular u wow yarap ya ka Jingiaseng Synod ha Sohiong ha u snem wa da dep hadien wa dam u kyrchaan ya oo.

Da ong u leh wa u CEM nood u wow kylla ktien hadooh ki kaam Blai.

Uwa yah khmat ka liang pyrchah u MDC ka Congress u Manstudy Nongrem da ong u wa T. 133 klur da pynpra sakhiat ko ya ki seiñ saiñ pyrthai ka KHADC.

Kamjooh u MDC ka UDP na Shella, u Teinwell Dkhar da pynbaad u wa u CEM da lai e work order hi u cha ki kattu katni ki briew kiwa haap ha ka thaiñ yong oo khlem iwon iwon leh i kynjoh ktien. Wei oo leh da tyrwa ya oo wow psiah cha ka PDF deiwa pynemkaam ya ka T. 133 klur.

Ka jubab hajrong ini wa klam ka liang pyrchah khamtam wa pynbaad u Sumer, u CEM ka KHADC da ong u wa emkaam wow pynsakhiat yei pynbaad wa ka T. 16 Klur toh wa mang neibynta ka party PDF heiwa u MDC ka PDF na Mawkhar da yieñ u leh wow pyrchah yeini wa chah pynbaad.

Share this:
Share on Facebook0Tweet about this on TwitterGoogle+0
Advertisement ad1