Khliehriat: Ha ka khyrwoh khubor wa da pyllait da u Satly Ryngkhlem, Waheh Chnong wa u Heatermoon Ryngkhlem, Secretary ka Chnong Wapungskur, East Jaiñtia Hills, hawa pynche yei mih khubor wa mih i kulmar ha kiwa boon ki thaw ha East Jaiñtia Hills ha ka sngi thap Vote wei da mih leh i pyrtuid leh ka Polling Station, Govt. LP School ha Wapungskur katkam ka khubor.
Ka Dorbar Chnong Wapungskur da pynche ko deiwa ong wa nadooh wa sdang ka la-ær ka Election MDC wei hadooh wa kut, ka ym em chong kli kti tangwa kreh chitom miet wa sngi yow sylli wei wow sonteri ya ka chong khnang wa ym em iwon iwon i kulmar ha kani ka Election wei ini i kreh chitom ka Dorbar Chnong man ko iwa jop hadooh wa da lai bait lai ryntih kani ka Election nadooh wa sdang hadooh wa ka kut.
I thap Vote leh man ko kawa lai bait wei ym em toh katkam wa mih khubor wa em ki bru wym em yoh ki u pynemkaam hok wow thap Vote.
Waroh kiwa thap Vote ha kani ka Polling Station da yoh ki wow pynemkaam yei hok yong ki da i mon laitlooid wei ym em iwon iwon i pynbor katkam wa mih khubor.
Ym em leh i yachoh namo i pyrchang wow tba kti ya u Piwell Shylla, u kyrtong MDC kamjooh ya ki bru yong oo wei da wan ki cha kani ka Polling Station deiwa suk wei mih ki leh da iwa suk wei ym leh i chah maham ki Polling Agent u Piwell Shylla.
Ka Dorbar Shnong ka yarap ko leh ya ki bor sorkar wow pynlai ya ka Election, yow lait u em iwon iwon i thut wei da kyntait leh yei mih khubor wa em ki bru wa ksoh boon tylli ki Slip thap Vote ha ki kti yong ki wei wa knieh leh ya ki Slip thap Vote na ki kti yong kiwi wei wow thap ya ki Vote yong kiwi.
U Presiding Officer wa ki Polling Officers, kiwa pynlai ya ka thap Vote, deilang wa ki Polling Agents yong ki kyrtong waphær waphær kiwa em ha ka Polling Station nadooh wa sdang hadooh wa kut ka thap Vote da sakhi lang ki wa i thap Vote ha Polling Station, Wapungskur Govt LP School man ko kawa lai bait wei da sñiaw phylla wa ha ka khubor wa ong wa chong kli kti wei da chah wow leh bor katwa mon neibhah ka aiñ leh emlang ko ha ka tai ka sngi.
Da pynkut deiwa ong wa waroh ini i chah pynbaad toh iwa khlem yurim wa iwa ym ye u pdiang.
Discussion about this post