15 49.0138 8.38624 1 1 4000 1 http://wyrta.com 300

Pynkup burom ya uwa sikai skur wa kiwa yalehbol ka Rymbai Government Secondary School

0 Comments
Advertisement ad1
Advertisement ad1

Jowai: Ka skur Rymbai Government Secondary School, Rymbai deilang wa kiwa kitkaam chnong hei emlang u Dolloi ka Elaka Rymbai, u Elious Swer, da pynkup burom ki ya u Riquoma Rq. Laloo, uwa sikai ka skur uwa dayoh u ya ka State Award ha kani ka Teachers’ Day wa dang dep man ha kani ka 5 tarik uni u bnai ha U Soso Tham Auditorium, Shillong.

Ha kani ka jooh ka step da pynkup burom leh ya ki 12 ngut ki khynnah yalehke football Under-14 yong kani kajooh ka skur kiwa da poi hadooh ka Final yong ka Subruto Cup kawa man ha Shillong; hajrong ini da saam leh ya ki khusnam cha kiwa jop ha ka Drawing & Painting Competition, Poetry Recitation, Essay Writing Competition wa ka Poem Writing, kiwa da pynyaleh da ka skur hei wow lehkmen ya ka tayaw Swachhata Pakhwada.

Advertisement ad1

Ya ka yalang da pynlai da kawi na kiwa sikai ka skur, ka B. Dayarisa Lyngdoh heiwa ka Headmaster ka skur, ka P. L. Nonglait da e ko i klam pdiang burom heijooh i por da khana ko ya ki kaam wa u Riquoma wa da kreh u hei wow pynku ya ki khynnah skur ha kiwa boon ki liang.

Ha i klam da yaroh ko ya oo deiwa ong, “Oo man u kam u pulit næ chipai uwa smat u tia heiwon iwon i eh i khoo, wei u wym jooh kyntait u yeiwon iwon i kaam wa da ekti ha oo” dei kyntien sñiawkhia wei sñiaw maya da ong ko, wa oo datoh bhah u wow yoh u ya kani ka Award weiwa yooluti ko yow dang yoh chooh chooh u neini chakhmat.

Da kyntu ko leh ya kiwa yalehke football wym hoi ware u pynlut por ki du ha ka bol, toh u kynmoo ki wa ki kaam wa ha khliehdooh yong ki toh i puræ puthi.

Neiliang ka Chnong Rymbai waroh kawi da jied ko ya u Finelyness Bareh wow man kam uwa e ki kyntien klam ha kani ka yalang heiwa u Finelyness leh da yaroh u ya u Riquoma yeiwa oo da kreh chitom sakhiat u yow rah yei burom, ym du ya oo samen tangwa wot ya ka skur wa ka District hi waroh kawi.

Da e u ki kyntien kitbok kit rwiang ya oo (Riquoma) deilang wa ya waroh kiwa yalehke football deiwa khana leh ya ka parom yong oo kam uwi na ki kiwa jooh yalehke football heipor wa dang lai skur u.

Ha kani kajooh ka yalang da pynmanlang leh ya ka e khublei (Farewell) ya kawi na kiwa kreh ka skur ya kawa da pynku kyrdan (promotion) na i LDA ka skur cha ka UDA ha yungkrehkaam DSEO, East Jaiñtia Hills District, Khliehriat, ka Nisaka Lyngdoh.

Kiwa klam ha kani ka sngi kynthup ki ya u Riquoma Rq. Laloo, ka Nisaka Lyngdoh, u Onickson Sumer wa ka Emika Bareh kiwa man kiwa sikai yong ka skur heiwa ya ki khusnaam cha kiwa jop ha ki yakob da saam lang da u Dolloi ka Elaka Rymbai u Elious Swer wa kiwi tawon kiwa krehkaam ka chnong.

Daw ap chwa i sniaw ki paidbah chwa wow chim y....

Previous

Jop ka Lumpyrtuh waka West Madan Mustem ha ka ....

Next

0 Comments

Leave a Reply