Jowai: Ka All Jaintia Dancers Association (Central Body) da pynkup warom ko ia u wi u khloor ka Ri-loom iong i u tæ toh u Micheal Syiemiong u nongchad wa chimbynta haka iakop chad Dance India Dance (DID) Season 5 uwa na ka chnong Laitkor. Ka AJDA da pynkup warom ko ia u ni u khloor chad ynne ka sngi ha yung walieh ka dorbar chnong Tpep-Pale.

U Micheal toh u khynnah khonswet wei da ri ia Oo da ka kong iong Oo deilang wa ka beipun wa u papun kiwa iarap poisa ia Oo. Da khana u ia ki nongthoh khubor wa ia Oo nadooh dang soo snem u da sah lai skur u cha Mumbai hadooh wa khlad ka bei u heipor wa dap u khatyndru snem te poi biang u cha Shillong.  Nadooh wada khlad ka bei iong Oo da sdang u kamai dei bor iong Oo hi deiwa hikai chad u ha ka skur Kiddies Corner kawa em ha Shillong. I jingkwah iong u Micheal katni toh u wai u iaka skur hikai chad ia ki khynnah.

I puræ puthi iong oo leh dang lai i chakhmat deiwa dang lai klas 12 u ha Umshyrpi College, Shillong.

Ha ka iakop chad DID da poi u hadooh ka kyrdan ‘Top Ten’ wa da ioh u psiah lyngba ka ‘Wild Card’. Hadien wa rem u ha ka Top Ten da ong u wa u Punit Pathak uwi naki nongchad wa pawnam tam iong ka India uwa man leh kam uwi na ki nongbichar ha ka DID da khut u ia u Micheal iow man kam u assistant ia Oo yow e sikai u ia ki nongchad ha Mumbai. Iwa sniaw sarong dooh toh wa ong u wa kwah u u pynku chwa ia ki khynnah ka Ri-loom iong Oo chwa.

Ka kong J. R. Khamni ka kong iong Oo kawa da lai lang wa Oo nadooh wa sdang u u lai audition ha Guwahati, Kolkata hadooh wa da poi u haka kyrdan ‘Top Ten’ ha ka DID season 5, da e khublei ko ia kani ka seiñ AJDC wada pynkup warom ko ia u Micheal ha kani ka sngi. Da ong haroh ko wa dei iah luti u Micheal yooluti wa daw em biang kiwa daw mihkhmat na kani ka Ri-loom iong i ha ki kam chad.

U Kongsan u Pillar Phawa da ong u wa hanlada ka jylla iong man ko kawa khian leh, sniaw sarong u wa em kaam uni u khloor uwa wan rah ia ka nam iaka Ri-loom iong i hanlada ym em u ioh u u poi chadooh ka thong iong ka jingjop. Da ban joor u deiwa ong u hawa kiwi ye ki i won i leh ym ye i, i leh toh u ye hi i. Da kit bok kit rawiang haroh u ia u Micheal Syiemiong wei ia waroh kiwa ha iung ha sem iong o.

Ka President seiñ kynthai iong ka Laitkor ka R. Kharkongor kawa da wan lang wa u Micheal ha kani ka sngi da ong ko wa ha Laitkor hi ym pu em u ioh ki u pynkup warom ki ia u Micheal, hynrei katwon wa sniaw sarong won ko wa ka AJDA da ye ko u pynkup warom ia Oo ynne ka sngi. Da ong haroh ko wa u Micheal toh u kynmo tympang bha u ia kani ka Association yei wada leh pynem warom ko ia Oo, ym hoi u mylliñ u ia kani ka Association ka All Jaintai Dancers Association.

U Micheal Syiemiong da e khublei kyrpang u ia ka ni ka Association weiwa chwa u kut kani ka pynkup warom ia u Micheal da pynioo u ia ka sap wa da em u ha oo dei wa da chad u kam ka sakhi ia ki paidbah ka chnong Jowai yei sap wada em ha oo.

Neiliang u President AJDA u Kyrchan Rymbai hawa e yei klam ha kani ka sngi, ong u ka seiñ pyneh bok eh nasib ko wa ka mynried mynkawi iong uni u khynroo uman ko kawa tyrchain kamjooh u nangku nangku u chakliar i nam.

Share this:
Share on Facebook0Tweet about this on TwitterGoogle+0
Advertisement ad1