15 49.0138 8.38624 1 1 4000 1 http://wyrta.com 300

Pynkut ka Amlarem Sub-Division Sport Association ya ka Amlarem Football League 2018

0 Comments

Jowai: Ka Amlarem Sub-divisional Sport Association (ASSA) da pynkut ko ya ka Amlarem Football League ynnin ka 5 tarik ha ki kyrdan waphær waphær wa pynman ha Mini Stadium Ladjaplem, Amlarem.

Ha ka 3 tarik uni u bnai da pyndep ya ka Super Division kawa wan sakhi da u montri ka chnat puræ puthi u Lahkmen Rymbui, u DSO ka WJH u H Shangpliang waka President ka ASSA ka J.U. Kharpuri wa kiwi kiwi kiwa chah khut sniawbha deilang wa ki paidbah, ya ka yakhun Final da pynman hapyrdi ka Sein Bhalang Shkentalang pyrchah ya ka Man-i-bha SC.

Advertisement ad1
Advertisement ad1

Ka yalehke hadooh wa kut i por da kut ko da 1-1 heiwa ka Sein Bhalang Shkentalang da thap kool nyngkong ko ha ka minit wa 50 lyngba u Sanu Dkhar tangwa u Emaya Rasmut ka Man-i-bha da su kylliang u ha ka minit wa 54.

Kamtæ ya kiwa jop da rai da ka yachut Tie-breaker heiwa ka Sein Bhalang Shkentalang da jop ko da 4-3.

Ha ka 5 tarik uni u bnai won da pynkut leh ya ka kyrdan Upper Division heiwa da wan sakhi u Banteidor Lyngdoh u montri ka chnat Sports & Youth Affairs.

Ya ka yakhun Final da pynman hapyrdi ka Jarain C&SC pyrchah ya ka Lumpyngngad S&C Sport Club.

Ka Lumpyngngad da yoh ko wow thap kool nyngkong lyngba u Syndai Swer ha ka minit wa 22 kawa da neh hadooh wa kut ka kylla step.

Ha ka kylla miet won ka Jarain da ye ko wow su kylliang ha ka minit wa 59 da ka kool u Pdianghun Suting kawa da neh hadooh wa kut i por kamjooh ha ka Extra Time.

Ha ka yachut Tie-breaker ka Jarain da jop ko da 3-0.

Ha kani ka jooh ka sngi da pyndep leh ya ka yakhun Final ka Lower Division hapyrdi ka Nongtalang Khla Chympa waka SS Moosakhia SC.

Ka Moosakhia da yoh ko yei naam jop da 2-0 da ki kool wa thap da u Smat Mukhim ha ka minit wa 32 wa u Micheal Mynsong ha ka mint wa 56.

Sa saam leh ya kini ki khusnam kiwa kamni ha wah:

Super Division

Top Scorer- Emaya Rasmut (Man-I-Bha Sport Club)

Man of the Match- Ajos Pohlong (Man-I-Bha Sport Club)

Best Goal Keeper- Sambor Tariang (Sein Bhalang Shkentalang)

Upper Division

Top Scorer- Theo Swer (Lumpyngngad S&C Sport Club)

Man of the Match- Pdianghun Suting (Jarain Cultural & Sport Club)

Best Goal Keeper- Miki Nongrum (Jarain Cultural & Sport Club)

Lower Division

Top Scorer- Rakesh Manner (Chnong Klor Sport Club Nongtalang)

Man of the Match- Remember Khongiong (S.S. Moosakhia SC)

Best Goal Keeper- Ioly Suting (S.S. Moosakhia SC)

 

Advertisement ad1
Advertisement ad1

Phah dorkhat ki Muster Roll cha u Conrad wym m....

Previous

Psiah Quarter Final sa ka Sookiru FC ha ka lym....

Next

0 Comments

Leave a Reply