15 49.0138 8.38624 1 1 4000 1 http://wyrta.com 300

Pynman esikai ka Khynroo Khyllood Namdong Parish yei man kordor i stat i tip

0 Comments

Jowai: Ka seiñ Khynroo Khyllood Namdong Parish hei ya krehlang wa ka yungkrehkaam ka Nehru Yuva Kendra, Jowai da pyman ko ya ka yalang pynsñiawthooh paidbah wa chi sngi ynnin ka 11 tarik ha chnong Namdong hajrong ka phang wa man kordor i stat i tip.

Ha kani ka sngi da wan chimbynta da ki khon khynroo khyllood ka chnong heiwa ya ka yalang da pynlai da u Wanbor Dhar. Ha chwa wow sdang ya kani ka yalang da yoh ya i klam pdiang burom ya ki bru chemphang (Resource Person) wa ya waroh kiwa emlang nadooh u Marbiangki War, hadien ini da yoh ya i klam naka P. Suting kawa na ka NYV Jowai kawa da batai ya ki khynroo khyllood chaphang i krehkaam ka NYKS Jowai.

Hadien ini da yoh ya i batai na u Br. B. Khyriem, Director yong ka Bosco Pnar Vocational Training Centre hajrong ka phang i kordor i stat i tip, wei da e nongmuna ya ka juk kawa katni heiwa lada ym em i stat i tip ym poi cheiwon cheiwon wei da khana u leh ya ki jait sikai waphær waphær wa ki khynroo khyllood wa ye ki u yoh yow ye ki u seiñ khih khamtam ha kani ka pyrthai wa dooh kreh.

Hadien ini won da yoh yei ki klam na u D. Lyngdoh, waheh chnong ka Namdong uwa da kyrpaad ya ki khynroo khyllood wow pynemkaam hok ya kawon kawon ka sap namo ha ki kaam wa kreh ki yow lait ki u sihlet hadien.

Ki khynroo khyllood kiwa wan chimbynta da pynsnaiw ki yei sniawngooh ya ka NYKS Jowai kiwa da pyman ya kani ka yalang pynsñiawthooh paidbah wei da yohmyntoi bha ki.

Ha chwa wow pynkut, da yoh ya ki kyntien e khublei na ka Konika Susngi Secretary yong ka SKKNP.

Ini toh katkam wa pyntip u M.War Vice President SKKNP.

Advertisement ad1

Chongkun ka Behdieñkhlam ka Raij Ialong heiwa ....

Previous

Da pynthymme ya kiwa kitkaam ka seiñ WJNC

Next

0 Comments

Leave a Reply