15 49.0138 8.38624 1 1 4000 1 http://wyrta.com 300

Pynman ka ATMA ya ka Kissan Kalyan Karyashalas wow pynku archah yei yohnong ki warep

0 Comments
Advertisement ad1

Jowai: Ka tnat Agriculture Technology Management Agency (ATMA) chirup wa i yakrehlang wa ka tnat Agriculture yong ka Laskeiñ Block wa ka Amlarem Block ynne ka sngi da lehkmen ko ya ka Kissan Kalyan Karyashalas kawa haap hapoh ka Gram Swaraj Abhiyan ha Yungwalieh ka Tpep Pale.

I lehkmen ya kani ka Kissan Kalyan Karyashalas man ko leh kam chibynta u lumlang ya ki warep yow pynsñiawthooh paidbah hajrong i rep i riang kamjooh chaphang ki Scheme waphær waphær yong ka sorkar pyrdi kamjooh ka sorkar jylla lyngba ki tnat krehkaam waphær waphær neibhah ka phang pyrdi yong ka toh yow pynku archah i yoh i kot ki warep khnang wa ha u snem 2022 u ye u pynman kaam ya ka thong yong ka sorkar pyrdi.

Advertisement ad1
Advertisement ad1

Ka W.C. Pariat kawa man kam ka Project Director, ATMA Jowai da pynsñiaw ko ya 7 tylli ki phang wada mang yow pynku ya ki warep wa kynthup yow pynbiang um ha ki thaw rep thaw riang neibhah khlem ka um i rep man i iwa sepai, iwa ar toh yow pynemkaam yaki symbe wabha hei thung itep wei uwa ye u pynmih chiboon, iwa 3 u pynmih ki Collection Centre khnang wa ki warep ym emkaam de ki wow ñiawliar wa cheiwon u pynlai yaaw ki ya ki mar deiwa lai booh hi eh ha kini ki thaw pyllang yow pynlai yaaw ya ki mar rep, i pyrkhat wow chna ya ki thaw pyn dait-thah (Cold Storage) ya ki mar rep khang wow pynduna ko i pyut ki mar rep, u pyn-heh ya ki Value Addition heiwa u pynwandur ya ki mar ha iwi tawon i dur kam ki jait baam wa ye u booh slem yow rap heh dor ki, u pynkrehkaam ya ki yaaw ki warep hadooh ki National Level, wei kammon u pynkrehkaam ya ki Scheme Insurance ki mar rep næ Crop Insurance yow yoh yarap kiwa rep.

Neitæ won ong ko wa i krehkaam ki warep chirup wa i ri mrad kam ki dakha, ki masi, ki sniang wa kiwi kiwi man ko ka laad wa ye u pynku chooh chooh yei yoh i kot yong ki warep.

Ha kani ka sngi ya ka yalang da pynlai da u W. Marbaniang, DAO Jowai, hei emlang u Deputy CEM ka JHADC u Lamdibok Sumer kam u kongsan nalor u EM ka JHADC, u Lasky Rymbai, ki sahep, ka tnat krehkaam waphær waphær ki warep wa kiwi kiwi.

U Lamdibok hei klam da yaroh u wa lyngba i pynman ya kani ka program u e myntoi ko ya ki warep neibhah boonsien hi ki warep chem ki boon i eh i khoo. Da ong leh wa hapoh ka ri 69% kiwa chong chnong em ki ha nongkyndong katwa 31% won ha sor, ini pynyoo ko wa kiwa sah ha nongkyndong toh kiwa im dei rep i riang wei kiwa pyndap baam ya kiwa sah ha sor. Kamtæ yooluti u wa lyngba kiwa boon ki thong ka sorkar neibynta ki warep u ye sakhiat u pynku archah yei rep i riang.

Ha kani ka sngi da yoh i klam pynche naki tnat waphær waphær yong i rep i riang hei yatoh wa ki Scheme wa ye ki warep u yoh myntoi wa kynthup i klam na u L.J. Niang, ADH, ka A. Passah District Sericulture Officer, ka B. Nongbri Research Officer Jowai, ka J.L. Nonglait Fishery Officer, ka M. Buhphang Sub Registrar of Cooperative Society, u Dr. P.B. Nongpluh SDVO Amlarem, ka J. Pohlong Joint Managing SFAC Shillong Director wa kiwi kiwi.

Da saam leh ya ki khusnam cha ki 4 ngut ki warep wa da lai bha chakhmat hei kaam rep kaam riang, 2 ngut na ka Laskein Block wa kynthup ya ka Judis Shylla na chnong Mowkaiaw wa da ye ko u kamai haka chi snem T. 1.50 lak hadooh T. 2.00 lak, u Basil Suchiang na ka chnong Moochrot wa da ye u kamai T. 2.80 lak hadooh T. 3.00 lak, ar ngut won na Amlarem Block wa kynthup ya u Silbinus Lyngdoh na ka chnong Syndai uwa da ye u kamai T. 4.65 lak wa ka Syllong Pohtam na ka chnong Kudeng Rim kawa da ye u kamai T. 1.90 lak haka chi snem.

Wiar uwi u khynnah uwa dang 10snem i rta

Previous

Daw sdang hoi noh ki Network Mobile Phone hapo....

Next

0 Comments

Leave a Reply